खोज

बुटवल, २५ मंसिर । नेपाल पत्रकार महासंघ कपिलवस्तुले गैर पत्रकारहरुलाई अन्य शाखाबाट सदस्यता दिलाई जिल्लामा स्थानान्तरण गराउन खोजिएको भन्दै त्यस्ता गैर पत्रकारहरुको सदस्यता खारेज हुने स्पष्ट पारेको छ । महासंघका सचिव जानु पाण्डेले आइतबार सदस्यता नवीकरण सम्बन्धी सूचना जारी गर्दै अन्य शाखाबाट स्थानान्तरण भई आउनेको पत्र आधिकारिकरुपमा महासंघमा नआएको र त्यस्ता सदस्यहरु अधिकांश गैर पत्रकार हुंदाहुंदै दबाबको भरमा नवीकरण गराएको पाइएकाले नवीकरण भएपनि सदस्यता खारेज हुने स्पष्ट पारेका छन् । ‘अधिकांश सदस्य गैर पत्रकार रहेका,पत्रकारले आफ्ना पत्नी, दाजुभाइ, ससुरालीका सदस्य, राजनैतिक दल र भातृ संगठनका प्रमुख र कार्यकर्ता तथा व्यापारी समेतको आवेदन पत्र आएकाले नेपाल पत्रकार महासंघको विधान दफा ७ उपदफा १(ङ) अनुसार नवीकरण गरिएपनि सदस्यता खारेज हुने जानकारी गराइन्छ’–महासंघका सचिव पाण्डेद्वारा जारी विज्ञप्तिमा उल्लेख छ ।
महासंघको सदस्यता नवीकरणका लागि नेपाल पत्रकार महासंघले वेबसाइटमा राखेको फारम अनिवार्यरुपमा भरी कागजात र नवीकरण रसिदको प्रतिलिपि पेश गर्न अनुरोध गर्दै महासंघले आवदेशन फारम नभरी नवीकरण रसिदले मात्र श्रेष्ता (रेकर्ड) कायम नहुने स्पष्ट पारेका छन् ।
महासंघमा हाल १६६ सदस्य छन् । स्थानान्तरणका लागि आएका नयां नामहरुमा एकाध वाहेक सबै गैर पत्रकार रहेको महासंघ जिल्ला शाखा स्रोतले जनाएको छ ।