खोज

बुटवल, ०२ माघ ।
पर्यटन क्षेत्रको विकासमा नीतिगत एकरूपता र दीर्घकालिन योजना जरुरी रहेको एक कार्यक्रममा बोल्ने बक्ताहरूले बताएका छन् । तीन तहकै सरकारमा नीतिगत रूपमा एकता र दीर्घकालिन योजना बनाउन सकेमात्र रूपन्देहीको पर्यटन विकासको बाटो खुल्ने उनीहरूले औल्याएका हुन । रूपन्देही होटल तथा रेष्टुरेन्ट ब्यवसायी संघको आयोजनामा जारी बुटवल खाना महोत्सव तथा माघेसक्रान्ती मेला २०८१ अन्तरगत मंगलबार भएको रूपन्देहीमा पर्यटन ब्यवसायको अवसर, अवरोध र निकास विषयक अन्तक्र्रिया कार्यक्रममा बोल्ने बक्ताहरूले सरकार पर्यटनको विकासमा दिर्घकालिन योजना अघि बढाउनुपर्ने सुझाव दिए ।
कार्यक्रममा आर्थिक अनुसन्धान केन्द्रका अध्यक्ष हुमराज भुषालले कार्यपत्र प्रस्तुत गर्दै रूपन्देही पर्यटनमा सम्भावना बोकेको स्थल भएको बताए । नेपालमा १ लाख ८१ हजार होटलहरू रहेको र जहा २ खर्ब १६ अर्ब रूपैया बढी लगानी रहेको उनले बताए । पर्यटनमा बुटवलको ईतिहास हेर्दा बि.सं.१८१६ मा पारि बुटवल निमचोकमा ढाके होटल संचालन भएको भेटिने उनले बताए । पछि बिस्तारै बि.सं.२०३८ सालदेखि यहाँका होटल ब्यवस्थित भएको पाउँछौ । रूपन्देहीमा होटल ब्यवसायबाट करिब १७,५०० बढि रोजगार पाएका छन। धार्मिक तिर्थ स्थल, फेरिएका भौतिक पुर्वाधारहरू, पर्यावरणीय नमुना पार्क, केवलकार नयाँ आशा, प्राविधिक र औधोगिक क्षेत्र सम्भावना भएको उनले बताए ।
अवरोधका रूपमा वित्तिय चुनौतीहरू रहेको भन्दै परियोजनामा आधारित लोनको ब्यवस्था हुनुपर्ने बताए । ‘समयसापेक्ष युवाहरूलाई प्रविधिमैत्री बनाउन जरुरी रहेको छ,’– उनले भने । पर्यटन रुट तयार गर्ने, बेलहिया नाकालाई आगन्तुकमैत्री बनाउने, नुवाकोट सास्कृतिक डबली र जितगढी किल्लामा विशेष प्याकेज स्थानीय बासिन्दासंग समन्वय गरि कार्यक्रम चलाउने, पर्यटन ब्यवसायमा रहेको क्षेत्रियताको भावना हटाउन जरुरी छ । अन्तर व्यापार आन्तरिक समझदारी कार्यान्वयन जरुरी, स्थानिय तहमा पर्यटन नीतिमा एकरूपता र स्पष्टता जरुरी रहेको उनले औल्याए ।
कार्यक्रममा पर्यटन उपाध्यक्ष तथा गोष्ठी संयोजक रोमाकान्त पाण्डेले बुटवलको पर्यटन विकासमा संस्थागत विकासमा लागेको बताए । बिसं २०५६ सालमा स्थापना भएको संस्था निरन्तर लागेको उनले बताए । सुस्ताएको पर्यटन क्षेत्रलाई आशा जगाउने गरि कार्यपत्र निर्देशन गर्ने उनले बताए । तिलोत्तमा नदीमा डुगा सयर जस्ता गन्त्बयस्थल बनाउन सरकारको ध्यान जान सके यसले बुटवलको पर्यटन विकासमा टेवा दिने उनले बताए ।
कार्यक्रममा बुटवल उपमहानगरपालिकाका उपप्रमुख सावित्रादेवि अर्यालले बुटवलको आर्थिक विकास पर्यटनबाटै सम्भव रहेको बताईन ।
नेपालमा पर्यटनबाट आर्थिकमा फड्को मारेको छ । बटुवालाई भगवानका रूपमा स्वागत सत्कार गर्ने नेपालीहरू अहिले यसैलाई ब्यवसायका रूपमा विकास भएको बताईन। बुटवल हुँदै दिल्लीका पर्यटकलाई मुक्तिनाथसम्म पुर्याउने योजना, पुरानो बुटवललाई एकरूपता दिने गरि परापुर्व कालको झल्को दिने गरि पर्यटकिय स्थल बनाउन आवश्यक तयारी गरिएको उनले बताईन । यसैगरि जितगढी किल्ला नजिक तिलोत्तमा नदिकिनारमा आरती केन्द्र बनाउनेसम्मका योजनाहरू रहेको उनले बताईन । स्थानिय सरकार आफ्नो क्षमता अनुसार पर्यटन विकासमा लगानी गरिरहेको उनले बताईन । सबै मिलेर नै यहाँको पर्यटन उकास्न सकिने उनले बताईन ।
कार्यक्रममा पर्यटन विकास परिषदका निर्देशक रामु जोशीले लुम्बिनी पर्यटनको लागि प्राकृतिक रूपमा नै उत्कृष्ट गन्तव्य भएको भन्दै प्रदेश सरकार निरन्तर प्रवद्र्धनका कार्यक्रमलाई जोड दिदै आएको बताए ।
कार्यक्रममा टिप्पणीकर्ता युवराज कंडेलले नीजि क्षेत्र र सरकारबाट एकीकृत विकासको खाका तयार गर्न सुझाव दिए । ऐतिहासिक रूपमा रूपन्देही पर्यटनमा सबल क्षेत्र भएको भन्दै यसको प्रचारप्रसार र पर्यटक भुलाउने गरि प्याकेजमा जोड दिनुपर्ने उनले बताए ।
कार्यक्रममा संघका अध्यक्ष लेखनाथ भण्डारीले ब्यवसायीहरूको संस्थागत हकहितसंगै पर्यटन प्रवद्र्धनमा संघ निरन्तर लागेको बताए । रूपन्देहीका पर्यटकिय स्थलको पहिचान, प्रवद्र्धन र विकासमा सरकारसंग सहकार्य गर्दै आएको समेत उनले बताए । प्राकृतिक सम्पदा र पुर्वाधारले सम्पन्न लुम्बिनी प्रदेश अवसरै अवसर भएको समेत दाबी गरे । कार्यक्रममा नेपाल होटल संघका निवर्तमान अध्यक्ष हिराध्वज शाह, लुम्बिनी होटल तथा रेष्टुरेन्ट ब्यवसायी संघका अध्यक्ष महेन्द्र श्रेष्ठ, संघका सल्लाहकार समुन्द्र जिसी, कुलचन्द्र पाण्डे, बुटवल उद्योग वाणिज्य संघका अध्यक्ष हरि अर्याल, राष्ट्रिय उद्यान महासंघका अध्यक्ष खेम लुईटेल, संघका अध्यक्ष महासचिव अर्जुन थापाले पर्यटकिय सम्भावना भएर पनि प्याकेज र प्रचार नहुँदा सोचजस्तो प्रगति हुन नसकेको दुखेसो गरे ।