खोज

विमस्टेक सम्मेलनको लागि नेपाल आएका श्रीलंका राष्ट्रपति मैत्रीपाला सीरीसेनाले लुम्बिनी भ्रमण गरेका छन् । बिमस्टेक सम्मेलन समापन पछि उनी लुम्बिनी भ्रमणमा आएका हुन् । उनको लुम्बिनी भ्रमणलाई निजी भ्रमण बताइएको छ । काठमाण्डौँबाट बिशेष प्लेनमा भैरहवा विमानस्थलमा आएका राष्ट्रपति त्यहाँबाट स्थलमार्ग हुदै लुम्बिनी पुगेका हुन् ।राष्ट्रपतिलाई नेपालका पर्यटन मन्त्री रविन्द्र अधिकारी, पाँच नम्बर प्रदेशका प्रमुख उमाकान्त झा, पाँच नम्बर प्रदेशका उद्योग पर्यटन वन तथा वातावरण मन्त्री लिला गिरीले लुम्बिनीमा स्वागत गरेका थिए ।

सिरिसेनाले लुम्बिनीमा मायादेवी मन्दिरमा रहेको मार्कर स्टोन, अशोक स्तम्भ लगायतको अवलोकन गरेका थिए । अवलोकन पछि उनि मायादेवी मन्दिर प्रांगणमै आयोजित बिशेष पूजामा समेत सहभागी भएका थिए । श्रीलंकाका धर्मगुरुहरुले राष्ट्रपतिको पूजा गाएका थिए । पूजा पश्चात लुम्बिनीको गुरुयोजना एवम लुम्बिनीको धार्मिक बिकास तथा समग्र पर्यटन अवश्थाबारे नेपालका पर्यटन मन्त्री रविन्द्र अधिकारीले राष्ट्रपतिलाई अवगत गराएका थिए । लुम्बिनी बारे जानकारी दिने उद्देश्यले आयोजित संक्षिप्त कार्यक्रममा श्रीलंकाका राष्ट्रपति मैत्रीपाला सिरीसेनाको तर्फबाट बिदेश मामिला सचिव रविनाथा टि आर्यसेनाले लुम्बिनी समग्र शान्ती अनुरागीको आस्थाको केन्द्र रहेकोले यसको बिकासको लागी श्रीलंकाको सहयोग सदैव रहने प्रतिवद्धता जनाए ।मायादेवी मन्दिरको अवलोकन एवम पूजा पश्चात राष्ट्रपति श्रीलंकाको गुम्बाको समेत दर्शन गरेको र श्रीलंकाद्धारा निर्मित गेस्ट हाउसको अवलोकनको साथै त्यहाँ वृक्षारोपण समेत गरेका छन ।श्रीलंकाका राष्ट्रपति लुम्बिनी आउदा यहाको प्रशासनले उच्च सुरक्षा सर्तकता अपनाएको थियो । भ्रमणको क्रममा उनको सुरक्षाको लागि देशको चारवटै सुरक्षा निकाय नेपाल प्रहरी, सस्शत्र प्रहरी, नेपाल सेना र राष्ट्रिय अनुसन्धान विभागलाई परिचालन गरिएको थियो । सुरक्षाकै लागी भैरहवाको गौतम बुद्ध बिमानास्थल देखी लुम्बिनी सम्म सवारी साधन आवागमन बन्द गरिएको थियो । सर्वसाधारणलाई पनि लुम्बिनी बिकास कोष क्षेत्र प्रवेश निषेध गरिएको रुपन्देहीका प्रमुख जिल्ला अधिकारी उदय बहादुर रानाले बताए ।

दुई जना हतियार सहित पक्राउ

श्रीलंकाका राष्ट्रपति लुम्बिनी भ्रमण आउनु पूर्व रुपन्देही प्रहरीले हतियार सहित दुई जनालाई पक्राउ गरेको छ । पक्राउ पर्नेहरुमा कपिलवस्तु जिल्ला शुद्धोधन गाउँपालिका वडा नम्बर ५ का २० वर्षीय राजेन्द्र लोध र रुपन्देही जिल्ला गैडहवा गाउँपालिका वडा नम्बर १ का १९ वर्षीय सुनिल कुमार यादव रहेका रुपन्देही प्रहरीले जानकारी दिएको छ । उनीहरुको साथबाट एक थान नलकटुवा पेस्तोल र एक थान चक्कु बरामद भएको रुपन्देही प्रहरी प्रवक्ता प्रहरी नायब उपरिक्षक कुमोध ढुङ्गेलले बताए । उनीहरुले प्रयोग लु ३९ प २९१९ नम्बर मोटरसाइकल समेत प्रहरीले नियन्त्रणमा लिएको छ । दुई वटा मोटरसाइकलमा चार जनाको समुहमा कपिलवस्तु देखि लुम्बिनी पुगेका मध्ये दुई जना पक्राउ परेका छन् भने दुई जना फरार रहेका छन् ।कपिलवस्तुबाट लुम्बिनी आउने क्रममा उनीहरुलाई लुम्बिनी सास्ंकृतिक नगरपालिका ६ लोखडिया चोकबाट नियन्त्रणमा लिइएको ढुङ्गेलले बताए ।