खोज

 जिल्ला प्रशासन कार्यालय गुल्मीले डिजिटल नागरिक वडापत्र शुरु गरेपछि कार्यालयमा सेवा लिन आउने सेवाग्राहीहरुलाई थप सजिलो बनेको छ । विभिन्न कामका लागि प्रशासन कार्यालयमा आउने सेवाग्राहीहरु कामका लागि अल्मलीन नपरोस् र उनीहरुले डिजिटल वडापत्रको माध्यमवाट सजिलै रुपमा सम्बन्धित फाँटहरुमा पुगेर छिटो छरितो रुपमा काम गर्न सकुन् भन्ने उद्देश्यले डिजिटल नागरिक वडा पत्र शुरु गरिएको प्रमुख जिल्ला अधिकारी यदुनाथ पौडेलले बताए ।
जिल्ला प्रशासन कार्यालयमा वर्षौदेखि नागरिक वडापत्र राखिए पनि सेवाग्राहीहरुले कहिल्यै पनि उक्त वडापत्र हेर्ने तर्फ कहिल्यै नजर पुराएका थिएनन् । तर कार्यालयले डिजीटल वडापत्र राखेपछि अहिले प्रशासन कार्यालयमा सेवा लिन पुग्ने जो कोहीले पनि एकपटक उक्त वडापत्रमा नजर नपुराई सुखै छैन । डिजीटल वडापत्रमा कुन फाँटमा के काम हुन्छ, उक्त फाँटको प्रमुख को हो ? र कोसँग सम्पर्क गर्नुपर्छ, के कस्ता कागजातहरु आवश्यकपर्छ, कुन कोठामा कुन फाँट रहेको छ ? सेवा प्रवाहको क्रममा केही गुनासो भए कोसँग सम्पर्क गर्ने भन्ने जस्ता कुराहरु स्क्रीनमार्फत सजिलै देख्न सकिन्छ ।
डिजीटल नागरिक वडापत्रवाट एकातिर सेवाग्राहीहरुलाई पटक पटक सोधिरहनु पर्ने जस्ता झन्झटवाट मुक्त हुने र अर्कोतिर सेवा लिनका लागि पनि अल्मलमा नपरि सरासर सम्बन्धित फाँटहरुमा पुग्न समेत सहज बनेको बताउँछन् जिल्ला प्रशासन कार्यालय गुल्मीका प्रशासकिय अधिकृत लक्ष्मण पाण्डेय । ‘कार्यालयमा पहिलो पटक आउने सेवाग्राहीहरुलाई प्रशासनमा सेवा लिन आउँदा कुनै व्यक्तिको सहारा लिएर आउने प्रचलन बढी मात्रमा थियो, आजभोली डिजीटल नागरिक वडापत्र शुरु भएपछि दुई सातामै उक्त समस्या धेरै कम हुँदै जान थालेको मैले अनुभव गरेको छु’ प्रशासकीय अधिकृत पाण्डेले भने ।
आफ्नो नागरिकताको प्रतिलिपि लिन मुसिकोट नगरपालीका ३ भराहादेखि जिल्ला प्रशासन कार्यालय आईपुगेका हरिप्रसाद घिमिरे पनि कार्यालयमा पहिलो पटक यसरी स्क्रीनमा सबैकुराहरु तस्वीरसँगै लेखेर सेवाग्राहीलाई जानकारी दिएकोमा आफै दंग परे । ‘टिभीमा के रहेछ भनेर हेरेको त, कार्यालयमा कहाँ के काम हुन्छ भनेर सबै छर्लङ्ग हुनेगरि बताएको पो रहेछ, हैन सिंहदरवारको अधिकार गाउँगाउँमा भन्थे हो रहेछ,’ घिमिरेले वडापत्रतिर हेरेर हाँस्दै भने ।
जिल्ला प्रशासन कार्यालयले यही साउन एक गतेदेखि उक्त डिजीटल नागरिक वडापत्र शुरु गरेको हो । उक्त वडापत्रमा जिल्ला प्रशासन कार्यालय गुल्मीका प्रमुख जिल्ला अधिकारीको कार्यकक्ष सहित ११ वटा शाखाहरुवाट उपलब्ध हुने सेवाप्रवाह सम्बन्धमा जानकारी दिईएको छ ।
जिल्ला प्रशासन कार्यालयमा आउने कतिपय सेवाग्राहीहरुले उक्त डिजीटल वडापत्र पढ्न नसक्ने भएका कारण उक्त समस्याको समाधानका लागि कार्यालयमा केही दिन भित्रमा हेल्पडेस्क स्थापनागरि सेवा प्रवाहमा थप सहजता प्रदान गर्ने प्रमुख जिल्ला अधिकारी पौडेलले जानकारी दिएका छन् । ‘सेवा लिन आएका सेवाग्राहीहरुसँग बाहिर लेखनदासहरुले मनपरि पैसा लिने गरेको गुनासो कार्यालयमा आएको छ, त्यसको समाधानको लागि कार्यालयमा चाहिने आवश्यक निवेदनका फर्मेटहरु पनि छपाएर हामीले यहीवाट निशुल्क रुपमा उपलव्ध गराउने तयारी गर्दै छौ’ प्रमुख जिल्ला अधिकारी पौडेलले भने ।
उनले सेवा लिन आउने सेवाग्राहीहरुलाई बाहिर राहदानीको फाराम भरेको र फोटो खिचेको शुल्क पनि महंगो लिने गरेको गुनासो आएको भन्दै उक्त समस्यालाई तत्कालै समाधानका लागि सम्बन्धित व्यवसायीहरुलाई राखेर छलफलगरि न्यूनतम दररेट कायम गर्न लागेको पनि उनले बताए ।