खोज

नेपाल सरकारका कृषि तथा पशुपंक्षी विकास मन्त्री चक्रपाणि खनालले मुलुकको समृद्धिका लागि कृषि क्षेत्रको विकास अपरिहार्य भएको बताएका छन् । दाङको घोराहीमा बिहीबारबाट सुरु भएको प्रदेशस्तरिय पोल्ट्री महोत्सवको उद्घाटन गर्दै मन्त्री खनालले देशको आर्थिक विकाशका लागि पनि कृषि क्षेत्रको विकाश गर्नुपर्ने बताएका हुन् ।

अहिले सम्मको परीपाटिमा कृषिकाम नगर्नेहरुलेपनि अनुदान लिएकोले विकाश नभएको बताउदै मन्त्री खनालले अव कृषि अनुदान गैर कृषकको हातमा नजाने बताए । ‘नेपाल कृषिप्रधान देश भएकाले कृषिको विकासबाट मात्रै समृद्ध मुलुक बनाउन सम्भव छ र सोही दिशामा सरकार अगाडि बढिरहेको छ’ मन्त्री खनालले भने । कृषिको विकासबाटै मुलुकको मुहार फेर्ने संकल्प यो सरकारले लिएको भन्दै कृषि मन्त्री खनालले सम्भावनाका आधारमा पकेट क्षेत्र बनाएर कृषिको विकास गर्दै जाने मन्त्रालयले योजना बनाएको जानकारी दिए । कृषि क्षेत्रको विकासका लागि अहिले विभिन्न योजनाहरु बनाउदै जहाँ जे सम्भावना छ त्यसकै आधारमा विभिन्न बालीनालीको पकेट क्षेत्र बनाउँदै जाने योजनामा सरकार लागिपरेको उनले बताए । ‘कृषिलाई निर्वाहमुखी भन्दा पनि जीवनमुखी बनाउने दिशामा सरकार अगाडि बढिरहेको छ’ मन्त्री खनालले भने । अबको १० वर्षभित्र भित्रमा मुलुक आत्मनिर्भर बन्ने भन्दै कृषि मन्त्री खनालले यसै वर्षदेखि आत्मनिर्भरताको यात्राको थालनी गरिसकेको बताए ।
अहिलेको सरकार विगतको जस्तो म्यादी सरकार नभएको भन्दै मन्त्री खनालले अबको पाँच वर्षभित्र मुलुकको स्वरुप नै परिवर्तन भइसक्ने गरी काम भैरहेको उनले बताए । सरकारले दशकलाई समृद्धिको दशकका रुपमा लिएको बताउदै मन्त्री खनालले पाँच वर्षभित्र आत्मनिर्भरताको जग बसिसक्ने दावि गरे । ‘सरकारको योजना अनुसार काम भैरहेकोले अवको दश वर्षभित्रमा मुलुक पूर्णरुपमा आत्मनिर्भर बनिसक्नेछ’ मन्त्री खनालले भने । दाङ जिल्ला उद्योग बाणिज्य संघले घोराहीमा गरेको सम्मान कार्यक्रममा बोल्दै मन्त्री खनालले कृषि क्षेत्रको विकासका लागि योजना निर्माण गरेर अगाडि बढ्नुपर्ने बताएका छन् । कृषि क्षेत्रमा अहिलेसम्म प्रभावकारी योजना निर्माण हुन नसकेकोले विकाश हुन नसकेको बताउदै उनले अव हरेक क्षेत्रमा योजना बनाउनु पर्ने बताए । नेपालमा अहिले पनि परम्परागत खेती प्रणाली रहिरहेको भन्दै मन्त्री खनालले अब कृषिमा आधुनिकीकरण आवश्यक रहेको बताए । नेपालमा ६६ प्रतिशत नागरिक कृषि पेशामा संलग्न भए पनि यसको विकास हुन नसकेको उनको भनाइ छ । ‘२ तिहाइ जनसंख्या कृषिमा संलग्नता हँुदा पनि बाहिरबाट आयात गर्नुपर्ने बाध्यताहुनु परनिर्भरता भएको उनको भनाई छ । त्यसैले अब कृषिलाई आधुनिक प्रविधिसँग जोडेर अगाडि बढ्नुको विकल्प नभएको उनले बताए ।
सुरक्षीत कुखुरा तथा दाना ब्यवसायी समिति दाङले आयोजना गरेको प्रदेशस्तरीय पोल्ट्री महोत्सवको उद्घाटन गर्न मन्त्री खनाल दाङ आईपुगेका हुन् । ‘कुखुरापालन एवं बजारीकरणको विकास, परनिर्भरमुखी अर्थतन्त्रको निकास’ भन्ने मूल नाराका साथ आयोजना भएको महोत्सव २० गते सम्म चल्ने छ ।
सुरक्षीत कुखुरा तथा दाना व्यवसायी समितिका अध्यक्ष तथा महोत्सव मूल आयोजक समितिका अध्यक्ष नीमबहादुर बुढाथोकीका अनुसार महोत्सवमा प्रदेशको पहिचान झल्कने कुखुरा जन्य वस्तुको प्रदर्शनी गरिने छ । महोत्सवमा कुखुरा उत्पादनका साथै प्रशोधित वस्तुको प्रदर्शनी तथा बिक्री गरिने अध्यक्ष बुढाथोकीले बताए ।