खोज

बुटवल,६ चैत । गुल्मी जिल्लाको धार्मिक पर्यटकीय स्थल रेसुङगामा आउदो बैशाख २३ देखि ३१ गते सम्म श्री राम महायज्ञ, श्रीराम महामहोत्सव र सन्त भक्त महामेला आयोजना हुने भएको छ । रेसुङगा संरक्षण समितिको आयोजनामा हुने महायज्ञमा भारतका ख्यातीप्राप्त योगी शम्भुनाथ जी,स्वामी राजेन्द्रनन्द महाराजवाट कथा वाचन हुने कार्यक्रम तय भएको छ ।
महामेलाको तयारीबारे स्थलगत अध्ययनका लागि भारतको अयोध्या र वनारसवाट प्रमुख कथा वाचक योगी शम्भु नाथ सहितको टोली गुल्मीको रेसुङगा पुगेर सन्त सम्मेलन गरी फर्केको छ । त्रेता युगदेखिको रेसुङगा र अयोध्या बीचको सम्वन्ध रहेको र लुम्बिनी प्रदेश सरकारले समेत रामायण कोरिडोरको अवधारणा अघि बढाएकाले यो महायज्ञले त्यसलाई टेवा पुग्ने प्रदेश योजना आयोगका पुर्व सदस्य डा. दामोदर भुसालले बताए ।
धार्मिक किंवदन्तीमा त्रेता युगमा अयोध्याका राजा दशरथकी पत्नीबाट छोराको जन्म नभएपछि रेसुंगामा तपस्या गरेर बसेका ऋषिश्रृंगा योगीद्वारा यज्ञ गराए छोरा जन्मिन्छन् भन्ने मान्यता अनुसार यज्ञ गराएपछि राम,लक्ष्मण र भरतको जन्म भएको उल्लेख छ । पछि राम, लक्ष्मण रेसुंगामा घुम्न गएका बेला पानी पोखरी बनाउन धनुष बांणले हानेर पहाड खोपेर पोखरी बनाएका हुंदा तिनलाई राम कुण्ड र लक्ष्मण कुण्ड ना राखिएको बताइन्छ ।
रामायण कोरिडोरले अयोध्यासंग जनकपुर,रेसुंगा,नवलपरासीको बाल्मिकी आश्रम, पाणिनी तपोभूमि लगायतका धार्मिक स्थलहरुलाई जोडेर पर्यटन प्रवद्र्धन गर्नसक्ने अपेक्षा गरिएको डा. भुसालले बताए । भारतमा ८० करोड हिन्दु धर्मावलम्बीहरु रहेकाले उनीहरुलाई रेसुंगा र नेपालका अन्य धार्मिक स्थलमा आकर्षित गर्न महायज्ञले सहयोग पुराउने आयोजकको विश्वास छ ।
योगी शम्भु नाथले अयोध्या धार्मिक कोरिडोरले नेपाल भारत दुबै देशमा धार्मिक पर्यटन विकास हुने बताए ।