खोज

बुटवल,६ चैत । सत्ता भोग गर्न गरिने गठबन्धनले जनताको मत खण्डित गरेको र लोकतन्त्रलाई कुरुप बनाएको छ । यस्तोमा देशको प्रमुख राजनीतिक दलको नेता त्यो पनि ५ पटक प्रधानमन्त्री भइसकेको नेताले कुनै दलले आफ्नो विचार र सिद्धान्तका आधारमा चुनावमा गएर वहुमत ल्याउन सक्नुपर्छ र त्यही अनुसार सरकार चलाउनुपर्छ भनेर बोल्न सक्नुपर्ने हो । तर नेपाली कांग्रेसका सभापति शेरबहादुर देउवाले सोमबार संसदमा बोल्दै गठबन्धनको संस्कारमा अभ्यस्त हुँदै जानुको विकल्प नभएको भन्दै निरीहता प्रकट गरेका छन् ।

प्रधानमन्त्री पुष्पकमल दाहाल प्रचण्डले राखेको विश्वासको मतको प्रस्तावमाथि संसदमा बोल्दै पूर्वप्रधानमन्त्रीसमेत रहेका देउवाले अहिलेको निर्वाचन प्रणालीले कुनै दलले एकल बहुमत ल्याउन सक्ने अवस्था नरहेको तर्क गरे । ‘हामीले अपनाएको चुनावी प्रणालीमा कुनै एक मात्र दलले प्रतिनिधिसभामा बहुमत ल्याउन सक्ने अवस्था नभएकाले गठबन्धन गर्नुपरेको छ’, देउवाले भने, ‘त्यसैले हामी गठबन्धनको संस्कारमा अभ्यस्त हुँदै जानुको विकल्प छैन।’   तर जनताले चाहे वहुमत मात्र होइन दुई तिहाई पनि दिनसक्छन् भन्ने जनमतको हेक्का देउवाले राख्न सकेनन् । यसको अर्थ देउवा गठबन्धन संस्कृतिमै रमाएर सत्तामा रहिरहने मान्यता भन्दा माथि उठ्न सक्दैनन् । जबकि जनताले गठबन्धनलाई रुचाएका छैनन् । हालै स्ववियुको चुनावमा पनि कैयौं कलेजमा गठबन्धनलाई पराजित गर्दै एउटै विद्यार्थी संगठनले वहुमत ल्याएका थुप्रै उदाहरण छन् ।