खोज

बुटवल,२२ माघ । राष्ट्रिय स्वतन्त्र पार्टीले आज बस्ने संसद वैठक वहिष्कार गर्ने भएको छ । नागरिकता मुद्दामा पार्टी सभापति रवि लामिछाने दोषी ठहर भएर सांसद र मन्त्री पद गुमेपछि लामिछाने विवादित बनेका छन् । पुनः नागरिकता लिएपछि रवि गृह मन्त्रालयमा फर्किन चाहेका छन् तर प्रधानमन्त्री प्रचण्ड उनलाई गृह मन्त्रालय दिन तयार छैनन् । यिनै विषयमा केन्द्रीत रहेर उक्त पार्टीको शनिबार बसेको केन्द्रीय समिति र संसदीय दलको संयुक्त बैठक विनानिष्कर्ष सकिएको थियो । यद्यपि, शनिबारको वैठकमा आइतबारको संसद बैठक बहिष्कार गर्ने निर्णय भएको बैठकमा सहभागी एक नेताले बताए ।

प्रतिनिधिसभाको बैठक आज दिउँसो १ बजे बस्दैछ । संसदमा रास्वपाका २० सांसद छन् ।

गृहमन्त्रालयबारे निर्णय लिन रास्वपाले प्रधानमन्त्री पुष्पकमल दाहाललाई दिएको समयसीमा हिजो साँझदेखि सकिएको छ । गृह नपाए सरकार छाड्ने लामिछानेको भनाईसंग उनको पार्टीभित्र पनि एकमत छैन । अधिकांश सांसदहरु सरकार छाड्न नहुने मतमा छन् । गृह मन्त्रालयको विषयलाई लिएर सरकार छाड्नु गृहमन्त्रालयप्रति पार्टीको पदलोलुपता ठहरिने अधिकांश सांसदहरुके भनाई रहेको स्रोतले जनाएको छ ।

‘गठबन्धनमा भइरहेको कुराकानीबारे सभापतिज्यूले जानकारी गराउनुभयो । गठबन्धनमा गृहमन्त्रालय र रास्वपामात्र विषय होइन । अलि बढी विषय यसैलाई मात्र बनाइएको हो कि भनेर पनि छलफल गर्‍यौं । हाम्रो बैठक भोलि साढे ११ बजे बस्नेछ’, उनले भने ।

राष्ट्रपति चुनाव, चितवन उपचुनावलगायत अन्य समसामयिक विषयमा पनि छलफल गरिएकाले कुराकानी गर्दै जाँदा बैठक लम्बिएको परियारले बताए । आज सरकारमा रहनेरनरहने बारे विषयले प्रवेश नपाएको भन्दै नेताहरू संवादमै रहेको उनको भनाइ छ ।

रास्वपाका सभापति रवि लामिछानेले गृहमन्त्रालयको अडान लिइरहँदा प्रधानमन्त्री गृहमा उनलाई फर्काउन सकारात्मक छैनन् । सत्ताघटकको प्रमुख दल एमाले अध्यक्ष केपी ओली भने रविको पक्षमा छन् ।