खोज

सम्पत्तिको लोभमा ज्वाइँ लगायत उनको परिवारका सदस्यहरू हत्या गरेको अभियोगमा जिल्ला प्रहरी कार्यालय बाँकेले चौध वर्षपछि एक जना भारतीय नागरिकलाई पक्राउ गरेको छ । २०६२ साल फागुन २३ गते राती नेपालगन्जको व्यस्त मानिने सदरलाईनस्थित न्यू दिप ज्वेलर्स पसलका सन्चालक दिपक हेमकार सहित उनको परिवारका चार जना र एकजना कामदारको घाँटी रेटेर हत्या गरिएको थियो ।
गुलाब देवी हेमकार, जगदेव हेमकार, सितादेवी हेमकार, दिपक हेमकार र ज्वेलर्समा काम गर्ने कुशुमका राम शनिच्चर चौधरी मारिएका थिए । रातको समयमा सबैको घाँटी काटेर हत्या गरेपछि कोठामा बन्द गरेर राखेको अवस्थामा शव फेला परेको थियो ।
उक्त जघन्य हत्याको घटनाको अभियुक्त अहिलेसम्म प्रहरीले पक्राउ गर्न सकेको थिएन । शनिबार भने हत्या गरिएका दिपकराज हेमकारका ससुरा भारत उत्तरप्रदेश सीतापुर जिल्लाका ६५ वर्षिय किशोरीलाल सोनीलाई नेपालगन्जबाट पक्राउ गरेको जिल्ला प्रहरी कार्यालय बाँकेका एसपी अरूण पौडेलले जानकारी दिएका छन् ।
जमुनाह नाकाबाट नेपालगन्ज तर्फ आएको भन्ने सूचनाका आधारमा उनलाई पक्राउ गरिएको एसपी पौडेलले बताए । प्रहरीले एउटा परिवार नै सिध्याउने गरी भएको घटनामा हत्या गरिएका दिपक हेमकारका ससुरा हत्याको घटनामा संलग्न भई फरार रहेको जनाएको छ । त्यति ठूलो घटनाको अभियुक्त अहिलेसमम कोही पक्राउ नपर्दा सम्भवत त धेरैले आश मारिसकेका थिए । तर बाँकेका अरूण पौडेल एसपीका रूपमा आएसँगै त्यति ठुलो घटनाको आरोपि पक्राउ पर्न सफल भएको छ । संकटकालको रातको समयमा भएको उक्त घटनामा दिपक हेमकार सहित उनको बुवा, आमा, भाई लगायतको हत्या भएको थियो ।
बाँके जिल्लालाई स्तब्ध पार्ने गरी घटेको उक्त हत्याको घटनाको मुख्य कारण सम्पत्ति नै रहेको माईती पक्षले हेमकार परिवारको सम्पत्ति लुट्नका लागि परिवारको नै हत्या गरेको आशंका गरिएको छ । एसपी पौडेलले घटनाका बिषयमा बिस्तृत अनुसन्धान हुने बताए ।à