खोज

पाल्पा, २५ पुस ।

तत्कालीन समयमा जिल्लाकै सबैभन्दा ठूलो शित भण्डारको निर्माण कार्य आरम्भ गरेको दशवर्षमा आठौंपटक म्याद थप गर्दा पनि भौतिक प्रगति ८० प्रतिशत मात्र पूरा भएको छ ।

तानसेन नगरपालिकाको प्राविधिक रेखदेखमा र भारतीय सरकारको आर्थिक सहयोगमा तानसेन नगरको बाघखोरमा निर्मित शित भण्डारको भौतिक प्रगति ८० प्रतिशत मात्र भएको छ ।

२०७१ सालको जेठ १५ गते निर्माण कार्य पूरा गर्ने गरी २०६९ साल फागुन २३ गते ४ करोड ९९ लाख ९१ हजार ९ सय ६ रुपैयाँमा हिमडुङ एन्ड ठोकर नुवाकोटले ठेक्का सम्झौता गरेको थियो । यहाँका कृषकहरुको कृषि उपजको भण्डारणको लागि भन्दै भारतीय सरकारको सहयोगमा २ सय मेट्रिक टन क्षमताको शित भण्डारको निर्माण कार्य अगाडि बढेको थियो ।

बुटवल पाल्पा सडक खण्डको डेढ किलोमिटरको दुरीमा ४ रोपनी क्षेत्रफलमा फैलिएको यो शित भण्डार गत वर्षमा २७ प्रतिशत मात्र भौतिक प्रगति पूरा भएकोमा हाल सम्म ८० प्रतिशत मात्र भौतिक प्रगति पूरा गरेको नगरपालिकाका मुख्य प्राविधिक राम प्रसाद पाण्डेले बताए ।

स्थानीय तहमा जनप्रतिनिधिविहीन समयमा निर्माण कार्य आरम्भ गरेको यस योजनाका लागि आवश्यक निर्माणजन्य सामग्रीको ढुवानीका लागि मौजुुदा सडकको स्तरोन्नतीको क्रममा नगरपालिका प्राविधिक र निर्माण कम्पनीबिच सडक स्तरोन्नतीको विषयमा लेनदेन नमिलेका कारण तत्कालीन समयमा निर्माण कार्यले गति लिन नसकेको निर्माण कम्पनीका एक प्राविधिकले बताए ।

दुई वर्षमा निर्माण कार्य पूरा गर्नुपर्ने योजना निर्माण कम्पनीले आलटाल गरेका कारण भारतीय राजदुताबासबाट रकम निकासा रोकिएको थियो । एक वर्ष अगाडि दातृ निकायबाट सहयोग रकम नआएपनि नगरपालिकाले आफनै श्रोतबाट निर्माण कार्य अगाडि बढाउने निर्णय गरेपछि निर्माण कम्पनीलाई ताकेता र भारतीय सरकारलाई जानकारी गराएको थियो । नगरपालिका आफैले निर्माण गर्ने जानकारी गराएपछि राजदुताबासका द्वितीय सचिवको स्थलगत भ्रमण पछि रोक्का भएको, रकम फुकुवा भएपछि कामले गति लिएको नगरपालिकाका प्राविधिक टिका थापा बताउछन् ।

निर्माण कम्पनीको म्याद सकिएपछि तानसेन नगरपालिकाले निर्माण कम्पनीलाई ठेक्का सम्झौता रकमको १० प्रतिशतका दरले जरिवाना उठाउँदै आएको थियो । निर्माण कम्पनीले महाबिनासकारी भूकम्पका कारण निर्माण कार्यमा काम गर्ने मजदुरको अभाव त्यसपछि कोभिडको महामारी जस्ता कारण देखाउँदै कामलाई गति दिएको थिएन । जिल्लाभित्रको क्रोनिक योजनाहरु भित्र पर्ने शित भण्डारको भौतिक संरचना निर्माण कार्य पुरा भएपनि भवनभित्र विद्युतीय उपकरण, मेकानिकल सामानको जडान गर्न अझ १० वर्ष त कुर्नु पर्ने त होइन ? भन्ने स्थानीयमा आशंका उब्जिएको छ ।