नवलपुर ।
नवलपुर क्षेत्रमा काम गर्ने कर्मचारीहरूको आवागमनलाई सहज बनाउन छुट्टै बस सेवा संचालनमा आएको छ। भरतपुरदेखि कावासोतीसम्म बिहान र बेलुका कर्मचारी मात्र बोक्ने गरी यो बस सेवा सुरु गरिएको हो।
यो बस सेवा कर्मचारी मिलन केन्द्र नवलपुर र जिल्ला प्रशासन कार्यालय नवलपरासी पूर्वको समन्वयमा सञ्चालन गरिएको हो। प्रमुख जिल्ला अधिकारी अरुण पोख्रेलले उक्त बस सेवा उद्घाटन गरेका थिए। उद्घाटन समारोहमा प्रमुख जिल्ला अधिकारी पोख्रेलले भने, “बस सेवाले कर्मचारीलाई समयमा कार्यालय पुग्न र सेवाग्राहीलाई सेवा दिन सहयोग पुर्याउने छ।”
भरतपुर र गैंडाकोट क्षेत्रबाट दैनिक रुपमा करिब ४५ जना कर्मचारी कावासोती जाने गरेका छन्। कर्मचारी मिलन केन्द्रका कार्यबाहक अध्यक्ष पूर्णहरी सुवेदीका अनुसार, यो बस सेवाले ती कर्मचारीहरूको आवागमनलाई निकै सहज बनाउनेछ।
बस व्यवसायीसँगको समन्वयमा चलाइएको यो बस सेवा कर्मचारीमात्रै ओसारपसार गर्ने र तोकिएको भाडादर अनुसार ७०५ रुपैयाँ भाडा व्यक्तिगत रुपमा लिने सहमति भएको कर्मचारी मिलन केन्द्रका सचिव हरिशंकर सुवेदीले बताए।
