खोज

काठमाडौं।

अमेरिकाको लस एङ्जल्सको जंगलबाट फैलिएको आगो हलिउड हिल्ससम्म पुगेको छ। आगो फैलिँदा त्यहाँका केही प्रसिद्ध स्थानहरू खाली गर्न थालिएको छ। खाली गरिएका स्थानहरूमा डल्बी थिएटर, हलिउड बाउल आउटडोर एम्फिथिएटर र हलिउड वक अफ फेम लगायतका स्थलहरू समावेश छन्। बीबीसीका अनुसार, आतंकित मानिसहरू सामग्री बोकेर अन्यत्र जान दौडधुप गरिरहेका छन्।

अधिकारिहरूका अनुसार, डढेलोमा परी कम्तीमा पाँच जनाको मृत्यु भएको छ। सहरमा प्रवेश गर्दा आगलागीका कारण एक हजार ५०० भन्दा बढी भवन नष्ट भएका छन् र एक लाखभन्दा बढी मानिस विस्थापित भएका छन्।

लस एन्जलस काउन्टीका अग्नि नियन्त्रक एन्थोनी मारोनले विपत्तिको परिमाण र गतिसँग जुधिरहेको बताएका छन्। “हामीले सक्दो प्रयास गरिरहेका छौं, तर लस एन्जलसका सबै विभागहरूमा यसलाई ह्यान्डल गर्न पर्याप्त अग्नि नियन्त्रक छैनन्,” उनले भने।

पासाडेनाका अग्नि नियन्त्रक चाड अगस्टिनका अनुसार, आगलागीका कारण ५०० भन्दा बढी भवन नष्ट भएका छन्। उनले अग्नि नियन्त्रकहरूको प्रशंसा गर्दै, आगलागी नियन्त्रण गर्न कठिनाइ भएको बताए। “उनीहरूको वीरतापूर्ण कार्यबिना आज आगलागीका कारण मृत्यु हुनेको संख्या बढी हुनसक्थ्यो,” उनले भने।

लस एन्जलस डिपार्टमेन्ट अफ वाटर एन्ड पावरका प्रमुख कार्यकारी जेनिस क्विनोनेसले प्यासिफिक पालिसडेसमा पानीको स्रोत (हाइड्रेन्ट) सुकेपछि पानीको जथाभावी प्रयोग नगर्न र जोगाएर नियन्त्रण गर्न आग्रह गरेका छन्।

अमेरिकाका नवनिर्वाचित राष्ट्रपति डोनाल्ड ट्रम्पले बुधबार आफ्नो सामाजिक सञ्जालमार्फत पानीको अभाव राज्यको वातावरणीय नीतिका कारण भएको दाबी गरेका छन्।

अमेरिकी राष्ट्रपति जो बाइडेनले डढेलो नियन्त्रणका लागि केन्द्रीय स्रोत र साधनसमेतको व्यवस्थापनमा ध्यान केन्द्रित गरिने बताएका छन्। उनले यसै साता इटालीको लागि तय भएको आफ्नो भ्रमण रद्द गरेका छन्। “हामी डढेलो नियन्त्रण गर्न जति सक्दो प्रयास गरिरहेका छौं,” उनले भने।