खोज

कपिलवस्तु, २३ असार
कपिलवस्तु जिल्लाबाट वैदेशिक रोजगारीमा जाने तथा ठगीका घटना बढि हुने गरेको देखिएको छ । चालु आर्थिक बर्षमा मात्रै सुरक्षित आप्रवाशन (सामी) कार्यक्रम अन्तर्गत जिल्ला प्रशासन कार्यालय कपिलवस्तुमा रहेको आप्रवाशन स्रोत केन्द्र (सहायता कक्ष) मा ठगीका १ सय वटा घटनाको उजुरी भएका छन ।

कपिलवस्तुको तौलिहवामा सामी कार्यक्रम तथा चालु आवको समीक्षा कार्यक्रममा कार्यक्रमका संयोजक सुभास रेग्मीले सो जानकारी दिए ।
चालु आर्थिक बर्षमा स्रोत केन्द्रमा २ सय २७ घटनाको उजुरी आएको थियो । जसमा ठगीका १ सय, वैदेशिक रोजगारीमा मृत्युका ३३ वटा, जेल परेका ६ वटा, स्वास्थ्य समस्या भई उद्दार खोजेका १२ वटा, हराएका ४ वटा, अलपत्र ५ वटा र अन्य समस्याका ६७ उजुरी आएका छन । जसमा १ सय ६५ समस्या समाधान भएका छन भने ६२ वटा उजुरी समाधानको प्रक्रियामा छन । केन्द्रले जिल्ला प्रशासन कार्यालय र प्रहरीको सहकार्यमा १ सय ठगीका घटनामा ७१ वटा घटना समाधान गरेको छ भने २९ घटना समाधानको प्रक्रियामा छन् ।

जसका कारण पीडितले यो आर्थिक बर्षमा ३ करोड ७९ लाख ५५ हजार ५ सय २५ रूपैया आर्थिक सहायता र क्षतिपूर्ति प्राप्त गरेका छन । सामी कार्यक्रमको तेस्रो चरण सकिदा सम्म कानुनी सहजीकरणका लागी ४ सय ९० जनाको उजुरी परेकोमा ३ सय ६३ जनाको घटना समाधान भई ११ करोड ५५ लाख ७० हजार ४ सय ७१ रूपैयाँ क्षतिपुर्ति भराउन र आर्थिक सहयोग प्राप्त गराउन सफल भएको संयोजक रेग्मीले बताए ।
बिगत पाँच बर्ष यता कपिलवस्तु जिल्लाको ४ पालिकामा सामी कार्यक्रम रहेकोमा चालु आवमा बुद्धभूमि नगरपालिकामा सामी कार्यक्रम सञ्चालनमा आएको छ । यसअघि जिल्लाको कपिलवस्तु नगरपालिका, बाणगंगा नगरपालिका, शिवराज नगरपालिका र मायादेवी गाउँपालिकामा सामी कार्यक्रम सञ्चालनमा थियो ।

सामी कार्यक्रम सञ्चालनका लागी तिनै तहका सरकार बीच समन्वयमा कार्यक्रम अगाडि बढ्नुपर्नेमा सरोकारवालाले जोड् दिए । तीन वटा चरणको समीक्षा र आगामी आवको कार्यक्रमको बिषय छलफल सँगै अब संघिय सरकार बाट पूर्ण सहयोग आउन नसक्ने हुदाँ कार्यक्रमको निरन्तरताका लागि स्थानीय तहको समेत सहलगानी बढाउनु पर्ने कपिलवस्तु नगरपालिकाका प्रमुख प्रशासकिय अधिकृत गणेश प्रसाद अर्यालले बताए । समीक्षा कार्यक्रममा कार्यक्रमबाट बिभिन्न पालिकामा खटिएका लक्ष्मि चौरसिया, अनन्ता न्यौपाने, चन्द्रा पोख्रेल र गोमा भण्डारीले कार्यक्रमको सफलताका कथाहरू प्रस्तुत गरे ।

स्थानीय तहले कार्यक्रमको अपनत्व लिनु प्रशंसायोग्य रहेको सामी हेल्भेटासका प्रदेश कार्यक्रम व्यवस्थापक पन्चराम चौधरीले बताए । उनले बुद्धभूमि नगरपालिकाले चालु आवमा आफ्नै स्रोतबाट कार्यक्रम सञ्चालन गरेकोमा आगामी आर्थिक बर्षमा संघ र प्रदेशले सहयोग गर्ने जानकारी दिए ।

त्यसैगरि संघको सहयोगमा यशोधरा गाउँपालिकामा पनि कार्यक्रम संचालनमा उनले जनाउ दिए । अन्य कार्यक्रम भएका जिल्लामा ठगीका घटना ३५ प्रतिशत बढि समाधान भएको देखिए पनि कपिलवस्तुमा व्यक्तिगत ठगीका घटना प्रशासन र प्रहरी सँग सहकार्य गरि ७१ प्रतिशत समाधान हुनु प्रशंसनिय रहेको उनले बताए । सुरक्षित आप्रवासन कार्यक्रमको दिगोपनाका लागि सो कार्यक्रमलाई नीति तथा कार्यक्रममै समेटेर जान उनले जिल्लाका पालिकाहरूलाई सुझाव दिए ।

सुरक्षित आप्रवासन कार्यक्रम प्रभावकारी देखिएकाले कार्यक्रमको निरन्तरताका लागि आफूहरू प्रतिबद्ध रहेको शिवराज नगरपालिकाका प्रमुख अजय थापाले बताए । आफ्नो नगरमा मात्रै ८ हजार बढि बैदेशिक रोजगारीमा रहेको र पौने २ अर्ब रेमिट्यान्स भित्रिएको बाणगंगा नगरपालिकाका प्रमुख चक्र अर्यालले जानकारी दिए । कार्यक्रमका कारण वैदेशिक रोजगारीबारे सूचना र उजुरी गर्न नागरिकहरू नगरमा सूचना लिन आउन थालेको उनले बताए । भरसक बिदेश जानै नपर्ने बातावरण बनाउन वा स्वरोजगार तालिम दिएर बिदेश जाने अवस्था सिर्जना गर्न आवश्यक रहेको कपिलवस्तु नगरपालिकाका प्रमुख सुदिप पौडेलले जोड दिए ।