खोज

सिद्धेश्वर शिवालय गौशाला संरक्षण समितिले आफ्नो जग्गा अतिक्रमणमा परेको जनाएको छ । बुटवल उपमहानगरपालिका –५ स्थित शिवालय मन्दिरले चर्चेको १७ कठ्ठा साढे १७ धुर जग्गा मध्ये अहिले करिब १० कठ्ठा मात्र देखिएको संरक्षण समितिका अध्यक्ष यादव प्रसाद गिरीले बताए । त्यस जग्गामा पनि सत्य साई केन्द्रले अतिक्रमण गरेको समितिले जनाएको छ ।
स्वामी श्री नारायण नन्दको नाममा रहेको विटौरी जग्गाको दर्ता नं ८३ को क्षेत्रफल ०–१७– १७.५ को तिरो २०२६ /२/२२ को रसिद नं १९६६ मा बुझेको तत्कालिन बुटवल नगरपालिका कार्यालयले सिफारिस गरेको छ । तर २०६२ सालमा नयाँ नापी गर्दा करिब १० कठ्ठा मात्र जग्गा भेटिएपछि संरक्षण समितिले जग्गाको खोजी गरिरहेको छ । २०१७ सालदेखि स्वामी श्री नारायण नन्दले मन्दिर बनाई पूजा आजा संचालन गरेकोमा जिल्ला प्रशासन कार्यालय रूपन्देहीमा २०६५/७ /२४ गते समिति दर्ता भएको थियो । तत्कालिन बुटवल खस्यौली नगर पञ्चायत कार्यालयले राधाकृष्ण टोलमा दर्ता जग्गा भित्र अरूले बसोबास गर्न नपाउने व्यवस्था गर्ने बारे पत्र काटिएको थियो । जुन प्रमाणले उक्त जग्गा समितिकै रहेको पुष्टी गरेको देखिन्छ ।
शिवालयको जग्गामा सत्य साई केन्द्रले आफ्नो दाबी गर्दै उच्च अदालत तुल्सीपुर बुटवल इजलास, जिल्ला अदालत हँुदै बुटवलल उप–महानगरपालिका न्यायिक समितिमा उजुरी दिएको छ ।
बुटवल उपमहानगरपालिका–७ वस्ने सत्य साई केन्द्रकी ५१ बर्षीया यमुना श्रेष्ठले समितिका अध्यक्ष विरुद्ध २०७४/१/२० गते जिल्ला अदालतमा मुद्दा दायर गरेकी छन् । त्यो मुद्दा जिल्ला अदालतमा विचाराधिन छ । अदालतले २०७५/०५/०५ गतेको लागि पेसी तोकेको छ । यस अघि मिति २०७३ साल साउन २६ गते सत्य साई केन्द्रकी अध्यक्ष लक्ष्मी कुँवरले शिवालय मन्दिर विकास समिति, नापी कार्यालय रूपन्देही, मातपोत कार्यालय रूपन्देही र बुटवल उपमहानरपालिका विरुद्ध उच्च अदालत तुल्सीपुर बुटवल इजलास (साविक पुनरावेदन अदालत बुटवल) मुद्दा दिएकोमा निवदेन नै खारेज भएको थियो । पछिल्लो पटक बुटवल उपमहानगरपालिका वडा नं ५ मा अवस्थित सत्य साई केन्द्र बुटवलको कार्य समितिको निर्णयले अधिकार प्राप्त व्यक्ति कार्य समिति सदस्य सन्तोष सिंहले २०७५ साउन महिनामा बुटवल उपमहानगरपालिका न्यायिक समितिमा उजुरी दिएका थिए । न्यायिक समितिले त्यसको विषयमा प्रतिउत्तर दिन समितिको अध्यक्षलाई बोलाएको छ । मंगलवार न्यायिक समितिको इजलासमा छफफल हुने बताईएको छ ।
सत्य साई केन्द्रका सिंहले भोग गरेको भवन, मन्दिर, संरचना, जग्गा भोगचलनमा बाधा पुराएको हु“दा निर्वाध भोग चलन गर्न पाउ“ निवेदन दिएका थिए । सिद्धेश्वर शिवालयमा अहिले शिवानन्द गिरीका छोरा दुर्गा प्रसाद गिरीले पूजाआजा गरिरहेका छन् । नगरपालिकाको रोहवरमा करिव ७ धुर जग्गा शिवानन्दको नाममा नामसारी गरिएको थियो । त्यो वाहेक सबै शिवालय मन्दिरको जग्गा रहेको संरक्षण समितीका अध्यक्ष यादव प्रसाद गिरीले बताए । उनले भने– शिवालयको मन्दिरमा व्यक्तिको घर बनेका छन् । सत्य साई केन्द्रले अत्याचार ढंगबाट अतिक्रमण गरेको छ ।’
शिवालयको जग्गा अतिक्रमण गर्ने केन्द्रका सदस्य पदाधीकारीहरूले उल्टै मुद्दा मामिला गरी तनाव दिएको उनले बताए । अहिले विवादित भन्दै नगरपालिकाले तिरो समेत बुझ्न मानेको छैन । संरक्षण समितिले ३ तलाको मन्दिर निर्माण गर्न लागेको छ । दुई वर्ष अघि देखि निर्माण थालिएको हो । दाताको सहयोगबाट निर्माण शुरु गरिएकोमा अहिले सम्म करिब २८ लाख रूपैयाँ खर्च भई सकेको समितिले जनाएको छ । शिवालय जीर्ण भएपछि जिर्णाेद्वार गरिएको हो । उता सत्य साई केन्द्रकी अध्यक्ष उमा रानाले उक्त जग्गा २०२८/०२९ वाटै सत्य साई केन्द्रले संरक्षण गरी भोग चलन गर्दे आएको दाबी गरिन् । उनले भनिन– वाढीले वगाएको जग्गा संरक्षण गरी भोग चलन भएको छ । त्यहा केन्द्र पुरानो विल्डीङ छ । पहिले संरक्षण नगर्ने अहिले हाम्रो हो भन्न कसरी मिल्छ ?’ सत्यसाई केन्द्रले करिब ६ कठ्ठा जग्गा भोग चलन गर्दे आएको उनले बताइन् ।