खोज

बुटवल,१६ माघ ।  भारतको खुनुवाबाट कपिलवस्तुको मर्यादपुर–बुटवल हुंदै चीनको सीमा केरुङसम्मको पदमार्ग निर्माण भएको छ । यो पदमार्ग कार्यान्वयनमा आए बुटवलको पर्यटन विकासमा नयां आयाम थपिने आशा पलाएको छ । खुनुवाबाट बुटवलसम्म करिब ६५ किलोमिटर दूरी छ  ।
लामो समयदेखि नेपालको पर्यटन प्रवर्द्धनमा लागेको अर्थबाउण्ड एक्सपिडिसनले भारतको खुनुवा नाकाबाट कुदान, तौलिहवा, जगदीशपुर ताल, बुटवल, मस्याम, तानसेन, आर्यभञ्ज्याङ, केलादीघाट, घिरिङ, रिसिङ, दमौली, बन्दीपुर, गोरखा, बोर्लाङ, टारीबेँसी, कटुञ्जे, मेगाङ, साल्मे, गोङ्गा, सिङ्लापास, पाङ्सिङ पास, सोम्दाङ, चिलिमे हुँदै रसुवागढीस्थित केरुङ नाकासम्म समेटेर पदमार्ग बनाएको हो ।

पदमार्ग भन्ने वित्तिकै विशेषगरी पहाडी र हिमाली क्षेत्रमा गरिने यात्राका लागि बनाइएको रुटलाई बुझ्ने आम धारणाका बीच अर्थ बाउण्ड एक्सपिडिसन अध्यक्ष राजन सिंखडाले नेपालको तराईको भूभागबाट पहाडी भूभाग हुँदै हिमाली भूभागलाई समेटेर नयां पदमार्ग बनाएका हुन् ।
समुद्र सतहबाट ६० मिटरमा रहेको खुनुवानाकाबाट सुरु हुने उक्त पदमार्ग चार हजार ८० मिटर उचाइको सिङ्ला पास गरेर रसुवागढी नाका पुग्न सकिने सिंखडाले बताए । । यो पदमार्ग चार सय ४० किलोमिटरको भएको र पदमार्ग पार गर्न आफूलाई १७ दिन लागेको सिंखडाले बताए।

नयाँ पदमार्गलाई २० देखि २५ दिनको बनाएर अगाडि बढाउन सकिए नेपालको पर्यटन र ग्रामीण अर्थतन्त्रमा समेत टेवा पुग्ने सिंखडाको भनाइ छ।
यो पदमार्गले बुटवलको पर्यटन व्यवसायीहरुमा नयां आशा पलाएको नेप्लिज होटेलियर्स एशोसिएसन एनएचए लुम्बिनीका उपाध्यक्ष दिलिप गौचनले बताए ।
‘यो पदमार्गले बुटवललाई पनि समेटेको हुंदा बुटवल क्षेत्रका पर्यटन व्यवसायीका लागि ज्यादै खुशीको कुरा हो, अब यसलाई कार्यान्वयनमा ल्याउन सरकारी र निजी क्षेत्रले प्राथमिकता दिनुपर्छ’– गौचनले भने –पदमार्ग हुंदै भारतबाट आउने पर्यटकलाई बुटवलमा विश्राम गराउन सके व्यवसायीले लाभ लिन सक्छन् ।’ एनएचएले पदमार्गका निर्माता सिंखडासंग छलफल गरी होटेल व्यवसायीले के सहकार्य गर्न सकिन्छ गर्न तयार रहेको गौचनले प्रतिवद्धता जनाए ।

पर्यटन क्षेत्रमा काम गर्दै आएको संस्था नाटा लुम्बिनीकी अध्यक्ष रचना पन्तले कपिलवस्तु , बुटवल, तानसेन हुंदै चीनसम्म पुग्ने पदमार्ग सांच्चिकै कार्यान्वयन भएमा बुटवलको मात्र नभई लुम्बिनी प्रदेशकै पर्यटन विकासमा कोशेढुंगा सावित हुन सक्ने बताइन् ।

‘यो पदमार्गमा अरब भन्दा बढी जनसंखया भएका देश भारत र चिनका पर्यटक आवत जावत गर्न थालेभने नेपालको पर्यटन क्षेत्रमा कायापलट नै हुन्छ, तर यसलाई कार्यान्वयनमा ल्याउन सरकारले भूमिका खेल्नुपर्छ । निजी क्षेत्र त सधैं तयार नै छ ।’ पदमार्गमा यात्रा गर्ने भारतीय र चिनिया पर्यटकलाई बुटवलममा बास बसाल्ने र खाजा, खाना खुवाउने, यहांको जितगढी,केबलकार लगायत पर्यटकीय स्थलमा घुमाउन सकियो भने यो पदमार्ग सांच्चिकै बरदान हुनसक्ने पन्तको विश्वास छ ।