खोज

काठमाडौं, २० माघ ।

नेपाल राष्ट्र बैंकले आज माघ २० गते बैंकिङ्ग प्रणालीबाट ४० अर्ब रुपैयाँ तान्ने घोषणा गरेको छ। केन्द्रीय बैंकले वित्तीय प्रणालीमा रहेको अधिक तरलता व्यवस्थापन गर्नका लागि अन्तर बैंक ब्याजदर ३ प्रतिशतभन्दा तल नझर्न दिने उद्देश्यले यो कदम उठाएको हो। राष्ट्र बैंकले ४० अर्ब रुपैयाँको निक्षेप संकलन उपकरण जारी गर्दै आज माघ २० गते २१ दिने अवधिको बोलकबोल प्रक्रिया आरम्भ गर्ने जनाएको छ। यससँगै, राष्ट्र बैंकले गत पुस २८ गते लिएको ४० अर्ब रकम आज परिपक्क भएपछि थप ४० अर्ब रुपैयाँ तान्ने भएको हो।

बैंकिङ्ग प्रणालीमा अधिक तरलता थुप्रिएपछि राष्ट्र बैंकले लगातार निक्षेप संकलन उपकरण प्रयोग गरेर पैसा बजारबाट खिचिरहेको छ। यो कदम अन्तर बैंक ब्याजदर ३ प्रतिशतभन्दा तल झरेको अवस्थालाई नियन्त्रणमा राख्नका लागि हो। ३ प्रतिशतभन्दा माथि जान सक्ने अवस्था आएमा तरलता बजारमा पठाउने र ३ प्रतिशतभन्दा तल गइरहेको खण्डमा बजारबाट पैसा खिच्ने व्यवस्था गरिएको छ।इच्छुक बैंक र वित्तीय संस्थाहरूले आज दिउँसो ३ बजेसम्म बोलकबोलमार्फत आवेदन दिन सक्नेछन्। यसका लागि साँवा र ब्याज भुक्तानी मिति फागुन ११ गते निर्धारण गरिएको छ। ब्याजदर भने बोलकबोलबाटै निर्धारण हुनेछ। बैंक र वित्तीय संस्थाहरूले न्यूनतम १० करोड र अधिकतम ५ करोड रुपैयाँसम्मको आवेदन दिन सक्नेछन्।

यसअघि, माघ १५ गते केन्द्रीय बैंकले ३० अर्ब रुपैयाँको निक्षेप संकलन उपकरण जारी गरेको थियो। यसमा १२ बैंकहरूले २५ आवेदन मार्फत १५ अर्ब ५० करोड रुपैयाँ जम्मा गरेका थिए, जसको औसत ब्याजदर २.९९ प्रतिशत कायम भएको थियो।अब सम्म, राष्ट्र बैंकले चालु आर्थिक वर्षको माघ १५ गतेसम्म निक्षेप संकलन उपकरणमार्फत ४४ पटकमा १६ खर्ब ९३ अर्ब २० करोड रुपैयाँ उठाएको छ, जसमध्ये २ खर्ब ६ अर्ब ५५ करोड रुपैयाँ फिर्ता हुन बाँकी छ।