© २०२३
बुटवल, २१ माघ । चिडियाखोला बालबिकास केन्द्रको वार्षिकोत्सवको अवसरमा विभिन्न दाताहरुबाट सहयोग हस्तान्तरण गरिएको छ । बुटवल उपमहानगरपालिका बडा नं–३ स्थित केन्द्रको बार्षिकोत्सव तथा सरस्वती पुजा (बसन्त पन्चमी) को अवसरमा शैक्षिक, वाटर डिस्पेन्सरी तथा खाना पकाउने भाडाहरु वितरण गरिएको हो ।
पहिलो पाईला नेपाल र व्यवसायी कृष्ण केसरीबाट बालबालिकाहरुलाई कापीकलम, बिस्कुट बितरण गरिएको थियो । यसैगरि तिनाऊटोलका युवाहरु किशन चर्तीमगर, करन प्रसाद भण्डारी, कमल गुरुङबाट पानी तातोचिसो बनाउने फ्रीज जडान भएको वाटर डिस्पेन्सर, बाजे गेडागुडी शान्तीटोलबाट ग्यास चुलो, शान्तीटोल चिडीयाखोलाकी सीता भण्डारीबाट सरस्वतीको मूति सौजन्य, प्रगतीशिलपथ निवासी धनेन्द्र श्रेष्ठका छोरा बिकास श्रेष्ठको परिवारबाट भाडा, प्लेट, कटौरा, चम्मच सहयोग भएको केन्द्रका कोषाध्यक्ष गोपाल कुमार प्रधानले बताए ।
कार्यक्रममा बुटवल उपमहानगरपालिका वडा नं ३ का वडाअध्यक्ष विष्णु प्रसाद ढकालले चिडियाखोलामा समुदायस्तरमा बालबालिकाहरुलाई शिक्षण सिकाईको केन्द्रको रुपमा केन्द्र स्थापित भएको बताए । बालबालिकाहरुलाई खेलकुदमार्फत शिक्षण सिकाईको आर्कषण बनेको बताए ।
कार्यक्रममा बालबिकास केन्द्रका कार्यबाहक अध्यक्ष मन्जु श्रेष्ठले न्युन आय भएका वडाबासीका बालबालिकाहरुलाई अक्षराम्भ गराउने र पढाईप्रति आर्कषण गराउन केन्द्र प्रभावकारी भएको भन्दै यसमा सरकारको लगानी बढाउन सुझाव दिए ।
कार्यक्रममा वडा सदस्य हरिनारायण मिश्रा, रतीमाला बिक, पहिलो पाईला नेपाल रुपन्देही शाखाका केन्द्रिय अध्यक्ष बिनोद बश्याल, केशव न्यौपाने, चौतारी बिजनेस ग्रुपका अध्यक्ष गगाधर न्यौपाने, शिक्षिका बिन्दु गौतमले समुदायका दाताको सहयोगबाट केन्द्र संचालन गर्न सहज भएको बताए । हाल केन्द्रमा ३२ जना बालबालिकाहरु अध्ययरत छन ।