खोज

लाइफ इन्स्योरेन्स कर्पोरेशन (एलआइसी) नेपाल बुटवल शाखाले कोरोना कहरका बीच पनि जीवन बिमा दाबी भुक्तानी रकम हस्तान्तरण गरेको छ । रुपन्देहीको तिलोत्तमा नगरपालिका शंकरनगरस्थित सीता राइसमिल नजीकै यही भदौ १० गते स्कुटी दुर्घटनामा ज्यान गुमाएका शंकर कार्कीको परिवारलाई बिमा दावी हस्तान्तरण गरिएको हो । शनिबार एक कार्यक्रमका बीच एलआइसी नेपालका बुटवल शाखा प्रवन्धक सूर्यबहादुर जिसी, एजेन्सी म्यानेजर यमबहादुर राना र उनका अभिकर्ता केशवकुमार श्रेष्ठले बीमा दावीबापत ४१ लाख ५४ हजार रुपियाँको चेक कार्कीकी पत्नी कृष्णकला कार्कीलाई हस्तान्तरण गरेका हुन् ।

मृतक कार्कीले २० लाख रुपियाँको जीवन तरंग बीमा गरी पहिलो किस्ताबापत एकलाख एकहजार रुपियाँ बुझाएका थिए । रकम हस्तान्तरण गर्दै एलआइसी नेपालका बुटवल शाखा प्रमुख सूर्यबहादुर जिसीले कोरोना कहरको यस्तो अवस्थामा पनि आफुहरुले बीमा दावी गरेको एकसातामै रकम हस्तान्तरण गरेको बताए । आफुहरुले प्रदान गरेको उक्त रकम मृतकको परिवारको घाउमा मलमको काम गर्ने उनले बताएका थिए ।

एजेन्सी म्यानेजर यमबहादुर रानामगरले आवश्यक कागजात पूरा गरेको एक हप्ताभित्र एलआइसी नेपाल लि.ले सहज ढंगले मृत्यु दावी रकम हस्तान्तरण गरेकोमा कम्पनीको विश्वसनीयताबारे आफ्नो धारणा राखेका थिए । स्वर्गीय कार्कीले एजेन्सी म्यानेजर यमबहादुरका अभिकर्ता केशवकुमार श्रेष्ठमार्फत जीवन बिमा गरेका थिए ।

उनको बुटवलबाट शंकरनगरतर्फ आउने क्रममा लु २६ प १४५५ नम्बरको स्कुटर दुर्घटना हुँदा गम्भीर घाइते भएका थिए । उनको मणिग्रामस्थित क्रिमसन अस्पतालमा उपचारका क्रममा मृत्यु भएको थियो । बीमा रकम बुझेपछि कार्कीकी पत्नी कृष्णकलाले संकटको बेला बीमा बापत पाएको रकमले ठूलो राहत पुगेको बताइन् ।