खोज

केहीदिन अघि घोराहीको कर्णाली विकाश बैङ्कका एक कर्मचारीलाई ज्वरो आयो । उनी स्वास्थ्य जाँच गराउनको लागी प्राईभेट अस्पतालमा गए । उनको लक्षण कोरोनासंग मिल्दोजुल्दो भएपछि उनलाई राप्ति स्वास्थ्य विज्ञान प्रतिष्ठानमा जान भनियो । उनले त्यसै गरे । प्रतिष्ठानमा उनको पिसिआर टेष्ट गर्दा कोरोना पोजेटिभ देखियो । लक्षण देखिएका संक्रमितलाई आईसियुमा राखेर उपचार गर्नुपर्ने भएकोले उनलाई बुटवल पठाईयो । अहिले पनि उनको बुटवलमै उपचार भैरहेको छ । जिल्लामा रहेका अस्पतालमा आईसीयु भएपनि जनशक्ति नहुँदा उनलाई बुटवल पठाउनु परेको हो ।

कोरोना सक्रमणको लक्षण नदेखिएकाहरुको जिल्लामा रहेको कोरोना विशेष अस्पताल, घोराही उपमहानगरपालिकाले बनाएको आईशोलेशन सेन्टर, देउखुरीका ४ पालिकाले बनाएको आईशोलेसन सेन्टर र राप्ति स्वास्थ्य विज्ञान प्रतिष्ठानमा राखेर उपचार भएपनि लक्षण देखिएका संक्रमितको उपचार दाङमा हुनसकेको छैन । लक्षण देखिएका संक्रमितको उपचारको लागि आवश्यक पर्ने भेन्टिलेटर र आईसियु वार्ड जिल्लाका अस्पतालमा भएपनि चलाउने जनशक्ति नहुँदा बुटवल पठाउने गरिएको छ । दाङको वेलझुण्डीमा प्रदेश नं ५ सरकारले स्थापना गरेको कोरोना विशेष अस्पतालमा र घोराहीमा रहेको राप्ती स्वास्थ्य विज्ञान प्रतिष्ठानमा गरी ८ वटा भेन्टिलेटर र १५ वटा आईसियू बेड छन् । यी दुई अस्पतालमा भेन्टिलेटर र आईसियु वेडहरु भएपनि आवश्यक जनशक्ति र प्रयाप्त बजेट नहुँदा प्रयोगमा आउन नसकेको अस्पतालहरुले जनाएका छन् ।

कोरोना विषेश अस्पताल बेलझुण्डीमा ५ वटा भेन्टिलेटर र ५ वटा आइसियु बेडहरु छन् । यी वेडहरु सञ्चालन गर्न न्यूनतम ३० जना डाक्टर सहित स्वास्थ्यकर्मीहरुको आवश्यक्ता पर्ने कोरोना विशेष अस्पताल बेलझुण्डीका सदस्य सचिव डा. सर्वेश शर्माले जानकारी दिए । उपकरण भएपनि जनशक्ति नहुँदा जटिल प्रकृतिका बिरामीलाई रिफर गर्नुपरीरहेको डा सर्वेश शर्माले बताए । “पिसिआर रिपोर्ट पोजेटिभ देखिएपनि लक्षण नदेखिएका संक्रमितहरुलाई मात्रै बेलझुण्डीको कोरोना विशेष अस्पतालमा राख्ने गरिएको छ भने, गम्भीर अवस्थाका बिरामीहरुलाई बुटवल रिफर गरिएको छ” सदस्य सचिव शर्माले भने । लक्षण सहितका विरामी धेरै नदेखिएकोले पनि जनशक्ति नथपिएको उनले बताए । उपकरणहरु तयारी अवस्थामा रहेकोले सकृय संक्रमितको संख्या बढ्दै गएमा जनशक्ति थपहुने डाक्टर शर्माले जानकारी दिए । “उपकरण र जनशक्ति तयारी अवस्थामा रहेकोले सकृय संक्रमितको संख्या बढेमा यहीवाट उपचार हुन्छ” डाक्टर शर्माले भने ।

राप्ती स्वास्थ्य विज्ञान प्रतिष्ठान घोराहीमा पनि तीन वटा भेन्टिलेटर र १० वटा आईसियु बेड राखिएको भएपनि प्रयोगमा भने आउन सकेको छैन । जनशक्ति नहुँदा सेवा दिन नसकेको प्रतिष्ठानका रजिष्टार रामप्रसाद प्याकुरेलले जानकारी दिए । कोरोनाको कहरकै विचमा भेन्टिलेटर र आईसियुका उपकरणहरु ल्याएर मुख्यमन्त्री शंकर पोख्रेलवाट उद्घाटन गराएको भएपनि प्रतिष्ठानसंग प्रयाप्त बजेट नहुदा जनशक्ति राख्न नसकिएको उनले बताए । “कर्मचारी राख्दा तलव दिनुपर्छ, सरकारले बजेट दिए पछि न हामिले तयारी गर्ने हो” प्याकुरेलले भने । उपकरणको जोहो गरेपनि त्यसलाई चलाउने जनशक्ति राख्नको लागी सरकारसंग बजेटको माग भैरहेको उनले बताए । “सरकारले बजेट दिएमा हामी तुरुन्तै जनशक्ति भर्ना गर्छौ” उनले भने । बुधवार मात्रै स्वास्थ्य मन्त्रालयमा जनशक्ति उपलब्ध गराईदिनको लागी पत्राचार गरेको उनले जानकारी दिए ।

उपकरण हुँदाहुँदै पनि कतै जनशक्ति त कतै बजेटको अभावमा आईसियु र भेन्टिलेटर प्रयोगमा आउन सकेका छैनन् । जिल्लामा भएका यी दुई अस्पताललाई व्यवस्थित मात्रै गर्न सके कोरोनाको कहरको समयमा संक्रमितले छिटै उपचार पाउने छन् ।