खोज

कोरोना महामारीका कारण महीनौदेखि घरमै थुनिएका विद्यार्थीलाई सक्रिय बनाउन रुपन्देहीको शुद्धोधन गाउँपालिको भगलापुर माविले घुम्ती कक्षा पढाइ कार्यक्रम गरिरहेको छ ।

शिक्षा विज्ञान तथा प्रविधि मन्त्रालयको वैकल्पिक प्रणालीबाट सिकाई सहजीकरण निर्देशिका २०७७ जारी भएपछि विद्यालयले गत असार महिनाबाट यस्तो कक्षा संचालनमा ल्याएको जनाएको छ । विद्यालयमा अध्ययनरत कक्षा १ देखि १० सम्मका करीव ७ सय विद्यार्थीले घुम्ती कक्षाबाट लाभ लिई रहेको विद्यालयको दाबी छ ।

कोभीड १९ को संक्रमणका कारण विद्यालय सञ्चालन गर्न सक्ने अवस्था नरहेपछि टोलटोलमा पुगेर विद्यार्थीलाई पठनपाठनमा सक्रिय बनाउन थालिएको विद्यालयका प्रधानाध्यापक कृष्णप्रसाद भूसालले जानकारी दिए । उनका अनुसार टोलका विद्यार्थीलाई टोलमै जम्मा गरेर सामुदायिक भवन र चौतारामा भौतिक दूरी कायम गरेर पढाइने गरिएको छ । विद्यार्थीको चाप बढी हुन नदिन विद्यालयले दुई चरणमा पठनपाठनलाई सहजीकरण गरेको उनले बताए ।
विद्यार्थीलाई विद्यालयमा पठनपाठन गराउँदा कोरोना संक्रमणको खतरा छ, त्यसैले एउटा टोलका विद्यार्थीलाई जम्मा गरी भौतिक दूरी कायम गरेर टोलमै पढाउन थालिएको हो, ’प्रधानाध्यापक भुसालले भने, ’शिक्षकहरु मास्क लगाएर र सेनिटाइजर तथा शिक्षण सामग्री सहित पुग्दा बालबालिहरुले आआफ्नो बस्ने व्यवस्थासहित टोल टोलमा जम्मा हुने गरेका छन् ।

विद्यार्थीका लागि विषयगत शिक्षकहरुको समूह बनाई बिहान ११ देखि अपरान्ह १ बजे र अपरान्ह १ बजे देखि अपरान्ह ४ बजेसम्म घूम्ती कक्षा पढाइ कार्यक्रम सञ्चालन गरिएको छ । वडाका जनप्रतिनिधि, विद्यालय व्यवस्थापन समितिका पदाधिकारी र अभिभावकको सहयोग र समन्वयमा टोल पढाइ कार्यक्रम सञ्चालन गर्न सम्भव भएको विद्यालयले जनाएको छ ।

रेडियो र टेलिभिजनका माध्यमबाट विद्यार्थीलाई पठनपाठन गराउन सक्ने अवस्था नभएपछि टोल पढाइ कार्यक्रम सञ्चालन गरिएको विद्यालय व्यवस्थापन समितिका अध्यक्ष मोती बहादुर थापाले जानकारी दिए । उनले टोल पढाइ कार्यक्रम सञ्चालन गर्न धेरै चुनौती रहे पनि बालबालिकालाई पठनपाठनमा सक्रिय बनाइराख्न विद्यालयले प्रयास गरिरहेको बताए ।

वैकल्पिक सिकाई सहजीकरणको सयोजन गरिरहेका शिक्षक कृष्णप्रसाद ज्ञवालीले पठन पाठनको सहजीकरण आफुहरु लागिरहेको बताए । उनले टोल टोलमा आफुहरु पुग्दा बालबालिका मात्रै नभइ अभिभावक समेत खुसी भएको बताए । विद्यालय व्यवस्थापन समिति र शिक्षक अभिभावक संघसँगको संयुक्त बैठकबाट घुम्ती कक्षा सञ्चालन गर्ने निर्णय भएको जानकारी दिए ।