खोज

बुटवल, १६ बैशाख ।  बुटवल ब्याडमिण्टन क्लबको छैठौँ साधारण सभा तथा पाँचौँ अधिवेशनबाट निर्विरोध नयाँ नेतृत्व चयन भएको छ । पंकज किशोर ज्ञवालीको अध्यक्षतामा १५ सदस्यीय नयाँ कार्यसमिति सर्वसम्मत रुपमा चयन भएको हो । क्लबको प्रथम उपाध्यक्षमा नलराज नेपाल , द्वितिय उपाध्यक्ष तुलसी राम भट्टराई (शम्भु), तृतिय उपाध्यक्ष भरत बहादुर राना , सचिवमा भानुभक्त खत्री , कोषाध्यक्षमा राजु खेरल , सहकोषाध्यक्षमा टिकाराम पन्थी र सहसचिवमा बलबहादुर गोदार चयन भएका छन् । समितिको सदस्यहरुमा लालमणी पन्थी , विश्वास नेपाल , नारायण तिवारी , बाबुराम पाठक , अशोक प्रधान , गोकर्ण पाण्डे र धरम विर खत्री निर्वाचित भएका प्रमुख निर्वाचन अधिकृत अर्जुन कार्कीले जानकारी दिए ।
क्लबका पुर्व अध्यक्ष ईन्द्रलाल श्रेष्ठले पाँच जना खेलाडीबाट २०६७ सालमा विधिवत रुपमा दर्ता भएको क्लबमा ३४ जना आजिवन र ७२ जना साधारण सदस्य रहेको बताए । बुटवल उपमहानगरपालिकाको संरक्षकत्वमा सञ्चालित क्लबले राष्ट्रिय खेलाडी समेत उत्पादन गर्न महत्वपुर्ण योगदान पुराएको श्रेष्ठले बताए । यस्तै, क्लबका अध्यक्ष गोपाल टण्डनले कोभिड महामारी संगै ब्याडमिण्टन खेलमा उदासिनता छाएकोले त्यसलाई पुरानै लयमा फर्काउन आवश्यक काम गरेको दावि गरे । उनले आफ्नो कार्यकालमा तिन वटा आन्तरिक र एउटा राष्ट्रिय खुला ब्याडमिण्टन प्रतियोगिता आयोजना गरेको र क्लबका उत्कृष्ठ २० जना खेलाडीलाई प्रशिक्षण समेत प्रदान गरिएको बताए । कभर्ड हलको मर्मत संभार र स्तरबृद्धिमा आफ्नो कार्यकालमा सकारात्मक कामहरु भएको बताए ।
यसैबीच क्लबको साधारण सभा तथा अधिवेशन उद्घाटन गर्दै बुटबल उपमहानगरपालिकाका नगर प्रमुख खेलराज पाण्डेले बुटबल ब्याडमिन्टन क्लबले छुट्टै पहिचान बनाएको भन्दै बुटबल उपमहानगरपालिकाले खेलकुद क्षेन्रको बिकासका लागि २ करोड बढी बजेट बिनियोजन गरेको बताए । लुम्बिनी प्रदेश खेलकूद परिषद सदस्य सचिव जय प्रकाश भट्टराईले बुटबल ब्याडमिन्टन क्लब यस क्षेन्रको पुरानो क्लब रहेको भन्दै यसले राम्रा राम्रा खेलाडी उत्पादन गरेको बताए । रूपन्देही जिल्ला ब्याडमिन्टन क्लबका अध्यक्ष महेन्द्र कुमार श्रेष्ठ, पुर्ब अध्यक्ष ईन्द्र कुमार श्रेष्ठ, सदस्य जिबन अधिकारी , भरत राना, सल्लाहाकार राजेन्द्र ढकाल लगायतले पछिल्लो समय ब्याडमिन्टन खेलप्रति आम मानिसहरूको मोह बढ्दै गएको बताए । क्लबमा १ सय ६ जना खेलाडीहरू रहेका छन् ।