खोज

कपिलवस्तुको चन्द्रौटामा जारी पाँचौं चन्द्रौटा महोत्सवको पाँचौं दिनसम्म दुई करोड बढीको कारोबार भएको छ ।
“कृषि, प्रर्यटन, उद्योग–व्यापार र रोजगार आर्थिक समृद्धि आत्मनिर्भरताको मूल आधार” भन्ने मूल नाराका साथ यही मंसिर ६ गतेदेखि संचालित महोत्सवमा १० गतेसम्म ५० हजार बढी दर्शकद्वारा महोत्सव अवलोकन गरिएको महोत्सवका प्रवक्ता जगत पौडेलले जानकारी दिएका छन् । महोत्सवका विभिन्न आकर्षणले दिनप्रति दिन दर्शकहरूको सहभागिता बढ्दो क्रममा रहेको महोत्सव प्रवक्ता तथा व्यापार संघ कपिलवस्तुका महासचिव पौडेलले बताए । पौडेलका अनुसार पाँचौं दिन मात्र ७ हजार दर्शकद्वारा मेला अवलोकन गरिएको र ३० लाखको कारोबार भएको छ ।
स्थानीय स्तरमा उत्पादित कृषि, उद्योग, हस्तकला, जडिबुटीहरूको प्रदर्शनीका स्टलहरूमा पनि दर्शकको भिडलाग्ने गरेको छ । भने बालउद्यान, राष्ट्रिय कलाकार, डान्स आइडल तथा हरिडान्स ग्रुप, छमछमी कलाकेन्द्रको प्रस्तुतिले दर्शकलाई तानेको छ ।
यता पर्यटकीय स्थलहरूको प्रचार प्रचार गर्ने उद्देश्यले शिवगढी मन्दिर, सोनवागढ मन्दिर, जगदिशपुर ताल, तिलौराकोट लगाएतका धार्मिक तथा पर्यटकीय स्थलहरूको फोटो प्रदर्शनीले समेत दर्शकको मन खिचेको छ । यसैगरी नेपालकै सबैभन्दा होची युवतीलाई हेर्न समेत दर्शकको घुइँचो लाग्ने गरेको स्टल संयोजक नवराज न्यौपानेले बताएका छन् ।
महोत्सवको मुख्य आकर्षण बनेको पाँचौ चन्द्रौटा डान्स आइडलमा ९ जनाले प्रतिष्पर्धा गरेका छन् । दर्शकको टिकटको भोट देशका बिभिन्न स्थानबाट एस.एम.एस.बाट दिएको भोटको आधारमा डान्सको नतिजा निकालिने गरिएको छ ।
महोत्सवको पाँचौ दिनमा सांस्कृतिक कार्यक्रमतर्फ मुख्य आकर्षकमा पप गायक मिग्मा सेर्पा, लोक आधुनिक गायक दिपक भण्डारी, हरिमाया रायमाझी, श्रीधर अधिकारीले दर्शकलाई भरपूर मनोरञ्जन प्रदान गरेका थिए ।
यस्तै मंसिर ११ गते मंगलबारका दिन लोक गायिका प्रीति आले, नारायण लेकाली, मिलन बिसी लगायतका राष्ट्रिय कलाकार तथा स्थानीय कलाकारहरूको प्रस्तुति रहने सांस्कृतिक संयोजक अर्जुन सापकोटाले जानकारी दिएका छन् । यसैगरी मंसिर ११ र १२ गते थारु सांस्कृतिक नृत्य प्रतियोगिताले समेत महोत्सव तताउने आयोजकको विश्वास रहेको छ । à