खोज

 “पाँचौं चन्द्रौटा कृषि पर्यटन तथा औद्योगिक व्यापार महोत्सव २०७५” को सबै तयारी पूरा भएको आयोजकले जनाएको छ ।“कृषि पर्यटन उद्योग व्यापार र रोजगार, आर्थिक सम्बृद्धि आत्मनिर्भरताको मूल आधार” नाराका साथ व्यापार संघ कपिलवस्तुले जिल्लाको शिवराज नगरपालिका ५, चन्द्रौटामा महोत्सव आयोजना गरेको हो ।
यही मंसिर ६ गतेदेखि १६ गतेसम्म संचालन हुन लागेको महोत्सव तयारीबारे मंगलबार महोत्सव स्थलमा आयोजित पत्रकार सम्मेलनमा महोत्सवका संयोजक महादेव पोखरेलले जानकारी गराएका थिए । महोत्सव संघीय सरकारका कृषि मन्त्री चक्रपाणि खनाल ‘बलदेव’ले उद्घाटन गर्ने जनाए । चन्द्रौटा महोत्सव जिल्लाको पश्चिमी क्षेत्रको पहिचान भएको भन्दै महोत्सवलाई सभ्य, भव्य र शान्तिपूर्ण तवरबाट सम्पन्न हुनेमा जोड दिए । अन्य वर्षको तुलनामा यसवर्षको महोत्सव फरक हुने दावी गरे ।
दुई लाख बढी दर्शकले महोत्सवको अवलोकन गर्ने र १० करोड बढीको कारोबार हुने महोत्सवका संयोजक तथा कपिलवस्तु व्यापार संघका अध्यक्ष महादेव पोखरेलले जानकारी दिए । महोत्सवमा राखिने २ सय ६० स्टल मध्ये ९५ प्रतिशत स्टल बुक भएको जानकारी दिंदै महोत्सवमा जिल्लाका पर्यटकीय क्षेत्रको फोटो प्रदर्शनी, महिला पुरुष कुस्ती दंगल, थारु कला संस्कृतिको प्रदर्शनी मुख्य आकर्षण रहने उनले बताए । महोत्सवको प्रत्यक टिकटको आम्दानीबाट १ रूपैयाँ नगरपालिकाका बर्थिङ्ग सेन्टरका लागि सहयोग प्रदान गरिने पोखरेलले स्पस्ट पारे ।
महोत्सवमा स्थानीय स्तरमा उत्पादित कृषि, उद्योग, हस्तकला, जडिबुटीहरूको प्रदर्शनीको स्टलहरू रहने आयोजकको भनाई छ । ख्याति प्राप्त राष्ट्रिय तथा स्थानीय कलाकारहरूको प्रस्तुति, काठमाडौं हरिडान्स ग्रुपको प्रस्तुति, पाँचौ चन्द्रौटा डान्स आइडल र थारु सांस्कृतिक नृत्य प्रतियोगिताले महोत्सव तताउने सांस्कृतिक संयोजक अर्जुन सापकोटाले बताए । à