खोज

 “पाँचौं चन्द्रौटा कृषि पर्यटन तथा औद्योगिक व्यापार महोत्सव २०७५” लाई सभ्य र भव्य रूपमा सफल पार्न हरेक क्षेत्रबाट सहयोग पु¥याउने सरोकारवालाहरूले प्रतिबद्धता जनाएका छन् ।
महोत्सव स्थलमा आयोजित छलफलका क्रममा सरोकारवाला व्यक्तित्वहरूले चन्द्रौटा महोत्सव चन्द्रौटा क्षेत्रको पहिचान भएकाले यसलाई सफलतापूर्वक सम्पन्न गर्न आ आफ्नो ठाउँबाट सहयोग पु¥याउने प्रतिबद्धता जाहेर गरेका हुन् । कार्यक्रममा आयोजक संस्था व्यापार संघ कपिलवस्तुका अध्यक्ष एवं महोत्सव मूल आयोजक समिति संयोजक महादेव पोखरेलले महोत्सवको तयारी र आकर्षणबारे जानकारी गराउँदै सरोकारवालाहरूसँग सकारात्मक सुझावको अपेक्षा सहित कार्यपत्र प्रस्तुत गरेका थिए । कार्यपत्रमाथि टिकाटिप्पणी गर्दै कार्यक्रमका सहभागी सरोकारावालाहरूले आफूहरूको महोत्सवप्रति सकारात्मक धारणा रहेको उद्घोष गरेका थिए । उनीहरूले महोत्सवलाई सभ्य, भव्य र शान्तिपूर्ण रूपमा सफल बनाउन आयोजकलाई सुझाव सल्लाहसहितको सहयोग पु¥याउने आश्वासन दिएका थिए ।
कार्यक्रममा शिवराज नगरपालिकाका नगरप्रमुख नेत्रराज अधिकारी, उपप्रमुख शिवकुमारी थारु, प्रमुख प्रशासकीय अधिकृत शेषकान्त पौडेलसहित चन्द्रौटा क्षेत्रका वरिष्ठ व्यक्तित्वहरू, समाजसेवी, बुद्धिजिवी, शिक्षाप्रेमी, राजनीतिज्ञ, विभिन्न संघसंस्था, क्लबका प्रमुख तथा प्रतिनिधि, महोत्सव सम्बन्धी विभिन्न समिति, उपसमितिका पदाधिकारीहरूको सहभागिता रहेको थियो ।
यही मंसिर ६ गतेदेखि १६ गतेसम्म चन्द्रौटामा संचालन हुन गइरहेको पाँचौं चन्द्रौटा महोत्सवको तयारी अन्तिम चरणमा पुगेको आयोजकको भनाई छ । महोत्सवलाई थप आकर्षक, भव्य र सभ्य बनाउन विगतका भन्दा फरक किसिमको व्यवस्थापन गरेको आयोजकले दाबी गरेको छ । महोत्सवमा जिल्लाका पर्यटकीय एवम् धार्मिक स्थलहरूको फोटो तथा भिडियो प्रदर्शनी, ऐतिहासिक शिवगढी मन्दिर तथा मूल गेटमा मायादेवीको मन्दिर निर्माण गरिने महोत्सव संयोजक महादेव पोखरेलले जानकारी दिए । महोत्सवमा बाल उद्यान, मौत कुवा, रोटे पिङ, जादुगर, कुस्ती प्रतियोगिताको समेत व्यवस्था मिलाइएको छ ।
साथै स्थानीय स्तरमा उत्पादित कृषि, उद्योग, हस्तकला, जडिबुटीहरूको प्रदर्शनीको स्टलहरू रहने स्टल संयोजक नवराज न्यौपानेले जानकारी दिएका छन् । महोत्सव अवधिभर दर्शकहरूलाई भरपूर मनोरञ्जन प्रदान गर्न ख्याति प्राप्त राष्ट्रिय तथा स्थानीय कलाकारहरूको प्रस्तुति, काठमाडौं हरिडान्स ग्रुपको प्रस्तुति, पाँचौ चन्द्रौटा डान्स आइडलको समेत प्रस्तुतिले महोत्सव तताउने सांस्कृतिक संयोजक अर्जुन सापकोटाले जनाएका छन् । त्यसैगरी महोत्सवको अर्को मुख्य आकर्षणको रूपमा थारु सांस्कृतिक नृत्य प्रतियोगितालाई पहिलो पटक प्राथमिकता दिइएको सापकोटाले जनाए । “कृषि, प्रर्यटन, उद्योग–व्यापार र रोजगार आर्थिक समृद्धि आत्मनिर्भरताको मूल आधार” भन्ने मूलनाराका साथ ब्यापार संघ कपिलवस्तुले महोत्सव संचालन गर्न लागेको हो ।