खोज

दाङ, २९ माघ । सूचना तथा संचार प्रविधिमन्त्री एवम् नेपाल सरकारका प्रवक्ता रेखा शर्माले नेपालको हुलाक सेवाको परम्परागत संरचना परिवर्तन गर्न आबश्यक रहेको बताएकी छन् । गृह जिल्ला दाङ आएको बेला नेपाल पत्रकार महासंघ दाङ शाखा, नेपाल प्रेस युनियन दाङ, प्रेस चौतारी नेपाल दाङ, प्रेस सेन्टर दाङ, प्रगतिशील पत्रकार संघ दाङले आज संयुक्त रुपमा आयोजना गरेको स्वागत तथा बधाई कार्यक्रममा उनले यस्तो कुरा बताएकी हुन् । २०२७ सालको कानुनमा रही अहिलेको संघीय संरचनामापनि पुरानै शैलीमा भईरहेको कामले प्रभावकारिता नदेखिएको हुँदा तत्काल हुलाक सेवाको पुनर्संरचना गर्न लागिएको बताइन् । समयसापेक्ष सूचना प्रविधि र संघीय संरचना अनुसार काम अघि बढाउने गरि ड्राफ्ट तयार भईसकेको जानकारी गराइन् ।
यसैगरी उनले मिडिया क्षेत्रमा देखा परेको समस्याका बारेमा मन्त्रालयको जिम्मेवारी सम्हालेसँगै जानकारी लिने काम शुरु गरेको हुँदा आगामी दिनमा पत्रकार र मिडिया क्षेत्रको सबलीकरण हुने खालका कार्यक्रम अघि बढाउने योजनामा आफू रहेको बताइन् ।
सूचना प्रविधिको विकासले फड्को मारिरहेको यो समयमा अहिले पनि थुप्रै संरचना पुराना र परम्परागत तरिकाले सञ्चालनमा आएको हुँदा ती संरचनालाई सुधारका प्रयास थाल्ने प्रतिवद्धता जनाइन् । सरकारी संचार माध्यमलाई प्रदेश स्तरमा व्यवस्थित गर्ने कामको थालनी गर्ने बताइन् ।
यसैगरी, जिल्लामा देखा परेको विकास निर्माणका काम, नागरिकका समस्यालाई समाधान गर्न हिजोका दिनबाटै लागिपरेको बताउदै उनले निर्वाचनको समयमा गरेका वाचा र प्रतिवद्धता नभुलेको बताइन् । सबैको चासोको विषय रहेको घोराही तुलसीपुरको चारलेन सडकका सन्दर्भमा केन्द्रमा आवाज उठाउने काम जारी रहेको बताउँदै उनले परिणाम देखिने गरि जिल्लाका सचेत नागरिक वर्गबाट सकारात्मक दबावलाई आत्मसात गर्दै परिणाम देखिने गरि काममा खटिएको बताइन्।
सोही कार्यक्रममा प्रेस काउन्सिल सदस्य शरद अधिकारीले फोरलेनको विषयमा भएको ढिला सुस्तीले नागरिकले पाएको सास्तीबाट छुटकारा दिलाउन मन्त्री परिषदमा विषय प्रवेश गराउन सुझाव दिए । दूरदराजका साना मिडियामा निशुल्क प्रेषणको व्यवस्था गरेमा तीन रुपैयाँको पत्रिकामा दुई रुपैयाँको टिकट टाँस्ने व्यवस्थाले हुनु नहुने बताए । लोक कल्याणकारी विज्ञापन कटौती भएको, विभेदकारी विज्ञापनले साना मिडिया मारमा परेका जस्ता समस्यामा ध्यान दिन आग्रह गरेका थिए । कार्यक्रममा पत्रकार महासंघ दाङ शाखा पूर्वअध्यक्ष प्रताप रेग्मी, सल्लाहकार सुदीप गौतम, पूर्वकेन्द्रीय सदस्य अजयदीप शर्मालगायतले भनाई राखेका थिए । नेपाल पत्रकार महासंघ दाङ शाख अध्यक्ष दुर्गालाल केसीको अध्यक्षतामा भएको कार्यक्रमको संचालन प्रेस सेन्टर दाङका अध्यक्ष पान्डब शर्माले गरेका थिए ।।।