खोज

बुटवल उपमहानगरपालिका वडा नं. ११ ईटाभट्टास्थित कुरैसी मासु पसललाई कारवाही गरिएको छ । बुधबार बुटवलमा गरिएको अनुगमनको क्रममा सो पसलमा लामो समयदेखि सडेगलेको ३ सय २० किलो बढी खसीबोकाका टाउको खुट्टा स्टोर गरि राखिएको भेटिएपछि कारवाही स्वरूप पसल सिल गरिएको हो । अयोग्य मासुजन्य पदार्थहरू नष्ट समेत गरिएको छ । उपभोक्ताबाट गुनासो आएपछि मासु पसलमा छड्के अनुगमनको क्रममा एउटै पसलमा त्यती ठुलोमात्रमा खान अयोग्य मासु भेटिएको हो ।
संचालक अब्दुल मुसलमानलाई पसल सुधार र ब्यवस्थापन गर्न सुझाव समेत दिईएको सहायक प्रमुख जिल्ला अधिकारी नारायण पाण्डेयले बताए । ‘पसलमा सुधार भएपछिमात्र खुल्छ ।’– उनले भने । कामदार सुत्ने कक्षमा लुकाईराखेको कुहिएका र खान अयोग्य मासु भेटिएको उनले बताए । पूर्वाधार निर्माण र स्वस्थ्यकर मासु पु¥याउने प्रतिवद्धता पसलेले गरेको र त्यो पुरा नहुँदा सम्म पसल सिल गरिएको उनले बताए ।
उपभोक्ता हित संरक्षण मञ्चका अध्यक्ष नुर्ब लामाले आम उपभोक्ता राम्रो र हाईजेनिक मासु खान पाउनुपर्ने अधिकारबाट बञ्चित हुनुपरेको बताए । मुल्य तिरेर पनि गुणस्तरीय बस्तु तथा सेवा पाउन कठिन रहेको उनले गुनासो गरे । स्थानिय सरकार यस विषयमा गम्भिर हुनुपर्ने समेत उनले सुझाव दिए । बुटवल उपमहानगरपालिका क्षेत्रमा बधशाला संचालनमा ल्याउनुपर्ने आवश्यकता रहेको भन्दै यस विषयमा उपमहानगरपालिका लाग्नुपर्ने उनले बताए । मासु ब्यवसायीहरूलाई बधशालाबाट सेवा संचालन गरिएमा पनि धेरैमात्रामा सुधार हुने उनले बताए । बधशालामा विशेषज्ञबाट मासुको जाँच हुने भएकाले पनि यसलाई संचालनमा जोड दिनुपर्ने उनले बताए ।
राज्यको नीति अभावमा उपभोक्ता र ब्यवसायीहरू मर्कामा परेको रूपन्देही मासु ब्यवसायी संघका अध्यक्ष कृष्ण पौडेलले बताए । मासु ब्यवसायीहरूले अपनाउनु पर्ने न्यूनतम मापदण्ड समेत बुटवल उपमहानगरपालिकाले तयार गर्न नसक्दा समस्या उत्पन्न भएको भन्दै उनले ब्यवसायीहरूलाई बधशालाको ठुलो अभाव रहेको बताए । स्थानिय सरकारले ब्यवसायीहरूलाई अनुमति दिएसँगै तालिमहरू दिन जरुरी रहेको उनले बताए ।
मासु भण्डारण गर्ने, ब्यवस्थापन गर्ने तालिमहरू दिनसकेमात्र उपभोक्ताहरूले गुणस्तरीय बस्तु पाउने उनले बताए । बधशाला तयार नहुँदासम्म अनुगमनले केवल ब्यवसायीहरूलाई दबाब दिने काम भएको उनले दुखेसो गरे । एउटा पसलेले गल्ति गरे उसैलाई कारवाही गनुपर्ने भन्दै उनले त्यसको आधारमा अन्य ब्यवसायीहरूलाई एउटै डालोमा हाल्न नहुने सुझाव समेत उनले दिए । चाडपर्वमा मात्र गरिने अनुगमनले सुधार नआउने समेत उनले दाबी गरे । नगरभरी नै सडक, खोला किनारमा पशु काट्ने काम रोक्न जरुरी रहेको समेत उनले बताए । रूपन्देहीमा आठ सय बढी मासु ब्यवसायीहरू रहेका छन ।