खोज

जिल्लाको महेशपुर भन्सारको स्तरोन्नति गरि मुल भन्सार बनाइए पछि एक महिनामै झण्डै एक करोड राजस्व संकलन भएको छ । महिनाको ५ देखि १० लाख मात्र राजस्व संकलन गर्ने भन्सारको स्तरोन्नतिसँगै राजस्व संकलनमा वृद्धि भएको भन्सार कार्यालयले जनाएको हो ।
भन्सारको स्तरोन्नति गर्दै अर्थमन्त्रीले सो भन्सारको उद्घाटन समेत गरिसकेको र अहिले भन्सार प्रमुख सहितको १७ जना कर्मचारी टोली कार्यालयमा खटि सकेको हुँदा भन्सार संकलनमा वृद्धि भएको छ । असोज महिनामा मात्रै ९९ लाख ४३ हजार ७ सय ६४ रुपियाँ भन्सार राजस्व संकलन भएको छ ।
जबकी असोज महिनासम्मको कुल भन्सार राजस्व १ करोड ९४ लाख १८ हजार ५ सय १० रुपियाँ रहेको छ । अझै पनि दैनिक रूपमा भन्सार गराउन आउने ब्यपारीको संख्या दिन प्रति दिन थपिदै जाँदा भन्सार राजस्व असुलीमा उलेख्य वृद्धि हुने अनुमान भन्सार कर्मचारीले गरेका छन् ।
दुई दशकदेखि महेशपुर भन्सारलाई स्तरोन्नति गरि मुल भन्सार नाकाको माग स्थानीय उद्योगी ब्यवसायीले गर्दै आएका थिए । यो बर्ष देखि भन्सारको स्तरोन्नति भए पछि राजस्व संकलनमा वृद्धिसँगै ब्यापारीलाई भारत र तेश्रो देशबाट पनि मालसमान पैठारी गर्न सजिलो भएको उबासंघका पूर्व अध्यक्ष समेत रहेका प्रदेश सांसद बैजनाथ जैसवालले बताए । उनका अनुसार पुरानै संरचनामा अहिले भन्सारमा कारोबार भइरहेको छ,तर यसले ब्यापारीलाई राहत र राज्यलाई राजस्वमा योगदान पु¥याएको छ ।
अब भन्सारका लागि आवश्यक सबै पूर्वाधारको निर्माण आवश्यक रहेको सांसद जैसवालले जनाए । महेशपुर बजार साँगुरो भएकोले भारी सवारी साधनलाई आउजाउमा समस्या देखिएको छ । त्यसैगरि भक्सिपुर स्थित झरही खोलाको पुल होचो हुनुका साथै कम क्षमता भएको पुल भएर भारी सवारी साधन सिधै जान सक्ने अवस्था नरहेकोले सरकारले अब पुल र भन्सारका लागि आवश्यक पूर्वाधारतर्फ ध्यान दिइनुपर्ने छ । महेशपुर बजार भित्रको सडक फराकिलो पार्नु पर्ने वा बजार बाहिरबाट बाईपासको ब्यवस्थापन समेत आवश्यक रहेको साँसद जैसवालले जनाए । भारतीय बजार ठूठीबारीको सडक समेत अब साँघुरो हुन थालेको छ । साना मालबाहक गाडी बाहेक ठूला मालबाहक गाडी बजारमा छिर्ने अवस्था नभएकोले ठूला ब्यापारी अझै महेशपुर नाका भएर मालबस्तुको पैठारी गर्न पाएका छैनन् । भन्सारका लागि आवश्यक पूर्वाधारका लागि नेपाल सरकारसँग माग गरिएको सांसद जैसवालले जनाए ।
भारतको कलकत्ता बन्दरगाह देखि नेपालको सबै भन्दा सानो दुरीको भन्सार महेशपुर भन्सार हो, यो कुराको उठान गर्दै उबासंघ र राजनीतिक दलबाट समेत बर्षाै देखि मुल भन्सार बनाउनका लागि गरिदै आएको माग अहिले पुरा भयो,सांसद जैसवालले भने, अब पुर्वाधारको आवश्यकता छ, त्यसको पनि सरकारले चाँडै निकास निकाले पछि महेशपुर भन्सारबाट ठूलो मात्रामा निकासी पैठारी हुनेछ । यसका लागि सरकारले तदारुकता देखाउन प¥यो,जति चाडो पूर्वाधार थपियो,त्यती नै चाँडै राजस्व वृद्धि गर्नमा सहयोग हुनेछ । नेपालको मध्यभागमा पर्ने जिल्ला भएको हुँदा यसको भविष्य राम्रो देखिएको उनले दाबी गरे ।