खोज

ब्राण्डेड बनिसकेका मुलुकका दुई ठूला पार्टी नोकिया फोनजस्तै भएको नयाँशक्ति पार्टी नेपालका प्रवक्ता डम्बर खतिवडाले टिप्पणी गरेका छन् । कुनै समय नोकिया फोनको ब्राण्ड नेपाली बजारमा जनस्तरसम्म पुगेपनि त्यसको आयू लामो समय नटिकेको उनको भनाइ छ । ‘कुनैपनि ब्राण्डेड चिजको आयू पाँचदेखि दशवर्ष हुने निश्चित छ’,खतिवडाले भने,‘नेकपा र कांग्रेसको पनि धेरै आयू छैन् ।’ जुनसुकै पार्टीमा आवद्ध भएपनि जनता स्थिर नहुने तर्क गर्दै उनले ‘ब्राण्ड पार्टी’ मा जनताले साथ नदिइरहने उल्लेख गरे ।
सोमबार जुम्रिबजारमा नेपाल प्रेस सोसाइटीले गरेको पत्रकार भेटघाट कार्यक्रममा बोल्दै नेता खतिवडाले सरकारले जनताको चाहना अनुसार काम गर्न नसकेको आरोप समेत लगाए । वर्तमान सरकारले केहीवर्ष राम्रो काम गरेको हेर्ने मन भएपनि जनताको चाहना बमोजिमका गतिविधि नहुँदा बाध्य भएर विरोध गर्नुपरेको उनले सुनाए ।
मुलधारको राजनीतिले देशलाई समृद्धितर्फ लैजान नसक्ने देखिएपछि वैकिल्पक पार्टीको रूपमा नयाँशक्ति पार्टी जन्मिएको प्रदेश पाँच इन्चार्ज नवराज सुवेदीले सुनाए । पार्टीले सातवटै प्रदेशमा नेता, कार्यकर्ताहरूलाई प्रशिक्षण कार्यक्रम सकाएर जिल्लातहमा लागिरहेको उनले जानकारी गराए । निर्वाचित जनप्रतिनिधीहरूले नीति निर्माण तहमा काम गर्नुपर्नेमा विकास निर्माणको क्षेत्रमा जनताको हुलाकी बन्ने गरेको उनको टिप्पणी थियो । ६८ वर्षपछि मुलुकमा कम्यूनिष्ट पार्टीको दुइतिहाई सरकार बनेपनि जनताको भावना अनुरूप काम गर्न नसकेको नेताहरूको आरोप छ । सात जिल्ला बाहेक सवै जिल्लामा पार्टीको संगठनात्मक संरचना गठन भइसकेको नयाँशक्तिले जनाएको छ ।