खोज

देवदह नगरपालिकाको आर्थिक वर्ष २०७५/७६ को नगर विकास योजना सार्वजनिकीकरण कार्यक्रम सम्पन्न भएको छ । एक कार्यक्रमका बिच देवदह नगरपालिकाले तेश्रो नगरसभाद्धारा स्वीकृत गरी नगर विकास योजना सार्वजनिकीकरण गरेको हो ।
सोही अवसरमा क्षेत्र नं १ प्रतिनिधि सभा सदस्य छविलाल विश्वकर्माले देवदह विकासको सम्भावना बोकेको क्षेत्र भएकाले यसको समुचित विकासमा सबै एकताबद्ध भएर लाग्नुपर्ने बताए । उनले संविधान बनेपनि संघियताको पहिलो अभ्यासमा रहेको हुदा धैर्यता र दुरदर्शिता खाचोपर्ने बताए । उनले परिवर्तनबाट प्राप्त भएका उपलब्धिहरूलाई जोगाउन नसक्दा धेरै ठूला ठक्कर खाइएको हुदा अब त्यसो नहुन संयतापुर्वक कार्यहरू अगाडि बढाइने उल्लेख गरे । पूर्व कृषि तथा सहकारी मन्त्री समेत रहेका बिकले विकासका योजनाहरूले सार्थकता पाउन सबैको साथ र सहयोग चाहिने हुदा विकासमा अवरोध सृजना गर्ने काम कसैले गर्न नहुने बताए । स्थानिय तहले आवश्यकताका आधारमा विकासका योजना बनाएमा प्रदेश र संघिय सरकारले सहयोग गर्ने बताए । देवदहको विकासको लागि लुम्बिनी विकास कोष संग पहल गरेर पर्यटनलाई बढवा दिने बताए ।
कार्यक्रममा प्रदेश नं ५का अर्थ, उद्योग तथा पर्यटन समितिका सभापति दधिराम न्यौपानेले समाजवादको परिकल्पना पुरा गर्न तिनखम्बे अर्थनितिलाई व्यवहारमा लागु गर्नुपर्ने बताए । उनले करका विषयमा कुरा उठाउदै जुन देशका नागरिकले कर तिर्न सक्छन् त्यो देश समृद्धिको दिशामा अघि बढ्ने बताए । उनले संयमतापूर्वक राज्यव्यवस्थालाई कार्यान्वयन गर्नका निमित्त विकास निमार्णका कार्यहरूलाई चरणबद्ध रूपमा लैजान सक्नुपर्ने बताए । संघिय लोकतान्त्रिक गणतन्त्र स्थापना गर्नको निम्ति देवदहले महत्वपुर्ण भूमिका खेलेको बताउदै देवदह विकासको धेरै सम्भावना बोकेको क्षेत्र रहेको बताए । कार्यक्रममा प्रदेश नं ५ का सांसद डा. कृष्णप्रसाद न्यौपाने, देवदह नगरप्रमुख हिराबहादुर खत्री, उप–प्रमुख बिद्यालक्ष्मी गुरुङ्ग, नगर प्रवक्ता झिल्लुप्रसाद न्यौपाने, नेपाल कम्युनिष्ट पार्टीका प्रकाश अर्याल, नेपाली कांगे्रसका बासुदेव रिमाल, राष्ट्रिय जनमोर्चाका हरि केसी, क्रान्तिकारी माओवादीका ऋषिराम लामिछाने, राष्ट्रिय जनमुक्ति पार्टीका डम्बरबहादुर थापा, गंगाप्रसाद पन्थी लगायतले आ–आफ्ना भनाई राखेका थिए ।