खोज

उप-प्रधान तथा रक्षामन्त्री इश्वर पोखरेलले कञ्चनपुरकी निर्मला पन्तको बलात्कार र हत्यामा संलग्न जोसुकै भए पनि कानुनी दायरामा ल्याईने बताएका छन् ।
आईतबार काठमाडौंमा सञ्चारिका समूहको सातौ महाधिवेशन तथा २२ औं साधारण सभाको उद्घाटन कार्यक्रममा उपप्रधानमन्त्री पोखरेलले निर्मला पन्तको क्रुरता र बर्बरतापुर्ण तरिकाले बलत्कारपछि भएको हत्याको गम्भीरता पुर्बक खोजी भएको बताएका हुन् ।
उनले केही दिन ढिला भएपनि निर्मलाको बलात्कार र हत्यामा संलग्न गिरोह उम्कन नपाउने प्रतिवद्धता जनाउँदै दुई चार दिन ढिला हुँदैमा अपराधी उम्किन्छन् कि भन्ने त्रासमा नरहन पनि आग्रह गरे ।
महिला बालबालिका तथा जेष्ठ नागरिक मन्त्री थममाया थापाले सञ्चारिका समूहले महिलामाथि हिंसा गर्ने कुरीति कुसंस्कार हटाउन सचेतना अभियान चाल्न पनि अनुरोध गरिन् । मन्त्री थापाले भनिन् समाजका कुसंस्कार, कुरीति र अन्धबिश्वास अन्त्यको लागि महिलाहरूलाई पत्रकारितामा ल्याउन र महिला पत्रकारलाई टिकाईरहन आवश्यक रहेको बताइन् । सोही अवसरमा सञ्चारिका समूहबाट चार जना पत्रकार पुरस्कृत भएका छन् । सञ्चारिकाले यस वर्षको ‘सञ्चारिका समानता पुरस्कार २०७४’ पत्रकार सन्त गाहा मगरलाई प्रदान गरेको छ । उक्त पुरस्कारको राशि १५ हजार रूपैयाँ रहेको छ । त्यसैगरी २०७४ सालको स्व. उमा सिंह पत्रकारिता पुरस्कार २०७४ अछाम जिल्लाबाट पत्रकारिता गर्दै आएकी पत्रकार गीता कुँवरलाई प्रदान गरेको छ ।
पत्रकार कुँवर अछामबाट अन्नपूर्ण पोष्ट दैनिक पत्रिकाको लागि रिपोर्टिङ गर्छिन् । उक्त पुरस्कार स्व. पत्रकार उमा सिंहको नाममा स्थापना गरिएको हो । उक्त पुरस्कारको राशि ७ हजार एक सय ११ रूपैयाँ रहेको छ ।
यस्तै सञ्चारिका प्रोत्साहन पुरस्कार २०७४ देशसञ्चार अनलाइनमा कार्यरत वर्षा शाह र कान्तिपुर दैनिकमा कार्यरत पत्रकार शिल्पा कर्णलाई प्रदान गरेको छ ।
छोटो अवधिमा सक्रिय भई पत्रकारिता गर्ने पत्रकार महिलालाई पेशामा थप उत्साह बढाउन सहयोग पुर्याउने उद्देश्यले २०६२ सालमा सञ्चारिका प्रोत्साहन पुरस्कार स्थापना गरिएको सञ्चारिकाले जनाएको छ ।
सञ्चारिकाको अध्यक्षमा नितु पण्डित सर्बसम्मत निर्बाचित सञ्चारिका समुहको अध्यक्षमा नितु पण्डित सर्वसम्मत भएकी छिन् । समूहको आईतबार काठमाडौंमा सम्पन्न सातौं महाधिवेशनले पण्डितको अध्यक्षतामा १३ सदस्यीय नयाँ कार्यसमिति चयन गरेको हो । समितिको उपाध्यक्षमा कमला पन्थी, महासचिवमा विमला तुम्खेवा, सचिवमा यशोदा अधिकारी, कोषाध्यक्षमा सीमा शर्मा सर्वसम्मत चयन भएकी छिन् ।
यस्तै सदस्यहरूमा कृति भट्टराई, पवित्रा सुनार, रुवी रौनियार, उर्वसी बस्न्यात, दुर्गा कार्की, बसन्ती बास्तोला, कविता थापा र सञ्चिता घिमिरे पनिसर्वसम्मत चयन भएका छन् ।