खोज

जिल्लाभरबाट आएका सवारीसाधनहरू सडकमै पार्किङ गर्दा बाग्दुला बजार क्षेत्र अस्तव्यस्त बन्दै गएको छ । सवारीको चाप दिनानुदिन बढ्दै गएको र पार्किङ गर्ने स्थान नहुँदा सर्वसाधारणलाई सास्ती हुने गरेको छ । बस, जिप, म्याजिकहरू बाग्दुला बजारको मुख्यचोकमै पार्किङ हुने गरेका छन् । बजार गर्न आएका सर्वसाधारणलाई अव्यवस्थित पार्किङले हैरानी बनाउने गरेको छ ।
जिल्लाको प्रमुख बजार केन्द्रको रूपमा रहेको बाग्दुलाबाट जिल्लाका गाउँ–गाउँमा सवारीसाधन छुट्ने गर्छन् । लामो तथा छोटो दुरीका सवारीहरू समेत यहीँबाट छुट्ने गरेका छन् । दिनप्रतिदिन सवारी जाम समेत बढ्दै गएको झिमरुक अर्डर एण्ड सप्लार्यस बाग्दुलाका संचालक प्रसु अधिकारीले बताइन् । ‘कतिपय व्यवसायीहरूले बाटो मिचेर घर बनाएका छन्’, उनले भनिन्, ‘नगरपालिकाको मापदण्ड पनि पालना गरिएको छैन् ।’ फराकिलो सडक र बसपार्क निर्माण नहुँदासम्म बाग्दुलामा सडकमै गाडी पार्किङको समस्या भइरहने उनले बताइन् । अस्तव्यस्त पार्किङले व्यवसायीहरूलाई समस्या पारेको उनले जानकारी गराइन् ।
बाग्दुला बजार क्षेत्रमा दैनिक झण्डै दुई सय वटा सवारीसाधन ओहोरदोहोर गर्ने जिल्ला ट्राफिक कार्यालय देविस्थान प्यूठानका प्रमुख, प्रहरी नायव निरिक्षक छविलाल ढकालले जानकारी गराए । जिल्लाभरमै बाग्दुला बजार क्षेत्रमा ट्राफिक व्यवस्थापन गर्न चुनौती भइरहेको उनले बताए । ‘बसपार्क नबन्दासम्म समस्या भइरहने देखिन्छ’, उनले भने, ‘यसबीचमा पनि जसोतसो व्यवस्थापन गरिरहेका छौँ ।’ दुई जना ट्राफिक प्रहरी बाग्दुलामा खटाइएको छ । फोप्लीको चुनढुंगा बोक्ने टिपरसमेत बजार क्षेत्रबाटै ओहोरदोहोर गर्दा थप समस्या भइरहेको उनको भनाइ छ ।
स्थानीय सरकारले निर्माणधिन टिकुरी बसपार्कलाई पूर्णता दिनतर्फ ध्यानदिनुपर्नेमा उनले सुझाव दिए । झिमरुक नदी नजिकै फाँटमा शहरी विकास तथा भवन डिभिजन कार्यालय रोल्पा मार्फत बसपार्क निर्माण कार्य भइरहेको छ । निर्माणाधिन बसपार्क झिमरुक खोलाको उच्च जोखिममा परेको छ ।
बिहान नौ देखि ११ बजेसम्म सवारीको चाप धेरै हुने गरेको छ । म्याजिक, बस र जिपहरूलाई बाध्यताले सडकको किनारामा छुट्टाछुट्टै पार्किङ गर्न लगाइएको ढकालको भनाइ छ । बाग्दुलाबाट बिजुवारतर्फको विद्युत पोलबाट माथीतर्फ म्याजिक गाडीलाई पार्किङ गर्न लगाइएको छ । ढकालका अनुसार जिल्लामा जनशक्ति थोरै हुँदा मुख्यबजार केन्द्रमा ट्राफिक व्यवस्थापन गर्न कठिनाई हुने गरेको छ । पुरानो दरवन्दी अनुसार जिल्लामा ट्राफिक प्रहरी परिचालन भएका छन् । दरवन्दी अनुसार नौ जना नै जनशक्ति भएपनि हाल सवारीको चाप अनुसार उक्त संख्या थोरै भएको ढकालले बताए ।