खोज

कपिलवस्तु,४ कात्तिक । नेकपा (एमाले) कपिलवस्तु क्षेत्र नं. १ प्रतिनिधि सभा सदस्यका उम्मेद्वार बलराम अधिकारीले नेकपा (एमाले) जनताको पार्टी भएकाले आगामी निर्वाचन पछि एमालेको बहुमतमा संघीय र सबै प्रदेश सरकार गठन हुने बताएका छन् । बाणगंगाका विभिन्न स्थानका मतदाता भेटघाट तथा पार्टीका सम्पर्क कार्यालय उद्घाटनका क्रममा एमालेको सरकारले राष्ट्रिय पुंजीको आधारमा जनतालाई शिक्षा, स्वास्थ्य, आवास, खानेपानी, विद्युत आदि विकासको पहुंचमा लैजाने बताए । अधिकारीले देशभरका जनताले सुर्य चिन्हमा भोट हालेर जनताका आधारभुत आवश्यकताहरु र गठबन्धन सरकारले अलपत्र पारेका विकास निर्माणका कामहरु एमालेको सरकारले पुरा गर्ने दावि गरे । एमाले नेतृत्वको सरकारले शिलान्यास गरेका देशभर ५ सय भन्दा बढी अस्पताल, संयौ सडकहरु गठबन्धन सरकारले खारेज गरि जनता माथि प्रहार गरेकाले त्यसको परिणाम अब जनताले देखाउने अधिकारीले बताए ।
पार्टीका केन्द्रिय सदस्य तथा लुम्बिनी प्रदेश सह ईन्चार्ज गिरधारीलाल न्यौपानेले गठबन्धन सरकार सेटिंगबाट चलेको बताउदै देशको विकासका लागि जनादेशको सरकार आवश्यक रहेको बताए । बाणगंगा ९ भलवाडमा पार्टीको सम्पर्क कार्यालय उद्घाटन गर्दै जनमतबाट बन्ने एमालेको सरकारले मात्र देशको विकास गर्न सक्ने बताए ।
यसैबीच नेकपा (एमाले) कपिलवस्तु क्षेत्र नंं.१ (क) प्रदेश सांसदका उम्मेद्वार बिष्णु पन्थीले बाणगंगाको पट्नालाई सडक संजाल र पुलको विकास गर्दै पुर्वाधार विकासमा जोड्ने काम अगाडि बढाएको बताएका छन् । बाणगंगाका विभिन्न वडामा मतदाता भेटघाटका क्रममा उनले पट्नाको विकासमा आफु तल्लीन रहेको बताएका छन् ।
त्यस्तै गोबड्डिहवा, पिपरा–धरमपुर, मेचकुरी पट्ना–पतरिया, लवनी–सिवलवा हुंदै नेपाल भारत सीमा सम्मको सडक खण्ड कालोपत्रे समेत आफ्नै पहलमा भएको उनले बताए । बैदौली, कोपवा—देउवापार हथौसा, वरवा—सोनपुर पट्ना हुंदै रुपन्देही जोड्ने सडकखण्ड र ओदारी भड्सडवा प्रगतिनगर, पट्ना हुंदै रुपन्देही जोड्ने सडकखण्ड पनि कालोपत्रे गर्ने प्रमुख प्राथमिकतामा रहेको बताए । त्यस्तै पट्ना स्वास्थ्य चौकीलाई स्तरोन्नति गरि बर्थिङ सेन्टर सञ्चालन गर्ने र प्राविधिक धार तर्फको शिक्षालाई यथाशिघ्र सञ्चालन गर्ने र अबको ५ बर्षमा पट्नालाई उज्यालो पट्ना बनाउने पन्थीले प्रतिवद्धता व्यक्त गरे ।
क्षेत्र नं. १ (ख) प्रदेश सांसदका उम्मेद्वार मधुसुदन शरण चौधरीले जनताका आधारभुत आवश्यकता र अपुरा विकासका कार्यहरुलाई पुरा गर्ने प्रतिवद्धता व्यक्त गरेका छन् ।