खोज

बर्दघाट, ७ असार । केही महिना अघि मात्र सम्पन्न नारायणी नदिमा बनेको पुल उद्घाटन नहुँदै क्षमता भन्दा धेरै चाप थेगीरहेको छ । नेपालकै सबैभन्दा लामो भनिएको झोलुङ्गे पुल सुस्ता गाउँपालिका वडा नम्बर ५ को पकलिहवा र ५ कै सुुस्ता जोड्ने नारायणी पुलमाथी बनेको हो । करिब १० वर्ष पहिलेबाट निर्माण सुरु भएको थियो । पुलमा अहिले भारतिय मोटरसाइकलको अत्याधिक चापको कारण समस्या हुन थालेको छ । हरेक २ सय ३ दशमलव ८ मिटरमा टावर खडा गरी बनाइएको पुलले प्रतिमिटर ३ सय ६० किलोग्राम भारवहन गर्न सक्छ ।

पैदल यात्रुको लागि भनेर डिजाइन गरिएको पुलमा अत्याधिक मात्रामा मोटरसाइकल द्रुत गतिमा क्षमता भन्दा धेरै तौल लिएर गुड्दा पुलमा अनावश्यक चाप परेको हो । नारायणी पारीको सुस्ता भारतिय सिमा विहार सँग जोडिएको छ, विहारमा खाद्य सामग्री देखि अन्य घरायसी प्रयोजनमा प्रयोग हुने सामग्री उत्तर प्रदेशको तुलनामा महँगो पर्ने र भारतिय विहारीहरू बजार गर्नको लागि यहि पुलको माध्यमबाट उत्तर प्रदेशका बजारहरूमा ओहोर–दोहोर गर्दा पुललाई चाप परेको सुस्ता गाउँपालिकाका अध्यक्ष टेक नारायण उपाध्यायले बताए ।
पुल मान्छेमात्र हिँडने गरि डिजाइन गरिएको हो तर भारतियहरू एउटै मोटरसाइकलमा ४ जनासम्म चढने र सामान ढुवानी गर्दा ३—४ क्विन्टलसम्म पनि लादेर पुलमा ओहोर–दोहोर गर्दा पुलको लठ्ठा कमजोर हुने, नटबोल्ट ढिला हुने लगायतका समस्या आउन सक्ने विषयमा प्राविधिकले सजक गराएको उनले बताए ।

अधिकांस भारतीय मोटरसाइकलले पुलको भार बहन क्षमता भन्दा बढी सामान ओसारपसार गरिरहदा पुल कमजोर हुने भन्दै सम्बन्धित ठेकेदार कम्पनीले सुस्ता गाउँपालिकाको ध्यानाकर्षण गराएको छ । गाउँपालिका अध्यक्ष टेकनारायण उपाध्यायले जिल्ला प्रशासन कार्यालय, जिल्ला प्रहरी कार्यालयमा समेत यस विषयमा जानकारी गराएको र अनुगमन र नियन्त्रणको लागि पहल गर्न सम्बन्धित निकायमा अनुरोध गरिएको जानकारी दिए ।

‘झोलुङ्गे पुल मोटरसाइकल वा अन्य इन्जिनयुक्त सवारीको आवागमनको लागि निर्माण गरिएको हुँदैन, यो त केवल मान्छे, पशु चौपायाहरूमात्र ओहोर दोहोर गर्नको लागि बनाइन्छ’ झोलुङ्गे पुल महाशाखाका प्रमुख इन्जिनियर कुमार थापाले भने । ‘मोटरसाइकल वा अन्य इन्जिनयुक्त सवारीको अवागमनले पुल नै भाइब्रेट (थर्थराहट) गराउने र पुलमा प्रयोग गरिएका लठ्ठा, नटबोल्टहरू कमजोर हुन जान्छ र पुलको आयु घट्छ ।’ इन्जिनीयर थापाको भनाइ छ ।

सुस्ताको लाईफलाईनको रूपमा हेरिएको यो पुलले नारायणि नदि सुस्ता पारिका नागरिकको जिवनस्तर उकासिने बिश्वास लिईएको छ । नारायणी पारीको सुस्ता गाँउपालिका वडा नम्बर ५ यो पुल बन्नु अघि नारायणी नदिमा ढुँगाको माध्यमबाट जानु बाहेक विकल्प थिएन । भारतिय बाटो प्रयोग गरि जाँदा अनेक कष्ट ब्यहोर्नु परेका सुस्ताबासी पुल बनेपछि जिवनस्तर सहज हुनेमा आशावादी छन तर नेपालको पुलमा समेत भारतियहरूको रजगज चल्न थालेपछि उनीहरूले समेत प्रशासन गुहार्न बाध्य रहेका छन ।

२३ करोड लागतमा निर्माण सम्पन्न भएको पुलको लम्बाई १ हजार ५ सय ७१ मिटर रहेको छ भने चौडाई १.६ मिटर रहेको छ । खुला सिमाका कारण पुलको वास्तविक उद्देश्य भन्दा फरक रहेर दुरूपयोग हुने तर्फ गाउँपालिकाले चिन्ता व्यक्त गरेको छ । पुलको भार बहन क्षमतालाई ध्यानमा राख्दै प्रहरी पोष्ट स्थापना गरिनु पर्ने वा निगरानी आवश्यक रहेको छ ।