© २०२३
बाँके, १८ साउन । नेपालगन्जको गर्मी चर्कियो । ठिक त्यतिनै बेला बिद्युत सेवा प्रभावित भएपनि सर्वसाधारण वाक्कदिक्क बने । बिद्युत माग गर्दै व्यक्तिगतरूपमा उठाएका मुद्दाको नेपाल बिद्युत प्राधिकरण नेपालगन्ज वितरण केन्द्रले सुनाइ गरेन । गर्मीबाट आहत भएका सर्वसाधारणको सारथी बन्दै बागेश्वरी असल शासन क्लवले प्राधिकरण बिरुद्ध आन्दोलन चर्कायो । सडकमै सुतेर नियमितरूपमा बिद्युत चाहिने मागलाई चर्कायो । परिणाम प्राधिकरणले अहिले विद्युत नियमित गरिरहेको छ ।
लामो समयदेखि उक्त संस्थाको अगुवाई गरिरहेका बागेश्वरी असल शासन क्लवका कार्यकारी अधिकृत नमस्कार शाह भन्छन्,–‘व्यक्तिगत गुनासो सुन्दै नसुनेपछि चर्को गर्मीमा प्राधिकरणकै अगाडि सुतेर बिरोधको आवाज उठाएपछि बिद्युत नियमित हुन लाग्यो । नेपालगन्ज जस्तो गर्मीमा बिद्युत नियमित हुनुपर्छ भन्ने सोंच कर्मचारीतन्त्रमा नभएका देख्दा दुःख लाग्यो ।’ उक्त क्लबले लामो समयदेखि यस्तै सामाजिक बिषयहरू उठाउँदै आएको छ ।
भ्रष्टाचार बिरुद्ध र सुशासनका पक्षमा काम गर्ने नेपालगन्जका युवाहरू मिलेर २०५७ साल मंसिर २४ गते यो संस्था संचालनमा ल्याएका हुन । गैरसकारी संस्थाकारूपमा ‘प्रोजेक्ट’मा आधारित कार्यक्रम पनि गर्दै आएको क्लव सामाजिक बिषयमा बिना स्वार्थ काम गरिरहेको शाह बताउँछन् । उनी भन्छन्,–‘कोभिडका बेला होस् चाहे बाढी पहिरो ! जनता आपतमा परेका बेला उहाँको आवाज बनेर निस्किने गरेका छौं ।’ क्लवको देशभर ७७ जिल्लामा शाखा, २० उपशाखा र १ सय इकाई रहेका छन् ।
नेपालगन्ज धार्मिक विविधताको शहर हो । यो यहाँको सबैभन्दा फरक बिशेषता भए पनि कहिलेकाँही समस्याका रूपमा देखा पर्छ । सबै धर्म सम्प्रदायका मानिसहरू शान्ति र सदभाव चाहने भए पनि उपद्रो तत्वले समस्या नल्याउन भन्नका लागि धर्म गुरुहरूको अन्तर धार्मिक सन्जाल गठन गरिएको छ । उनीहरूको एकता अद्भुत छ । नेपालगन्जलाई सदभावको शहरका रुपमा चिनाउन धार्मिक गुरुहरुले महत्वपूर्ण भूमिका निर्वाह गर्दै आएका छन् । कतिसम्म भने हरेक धर्मसम्प्रदायका कार्यक्रममा धर्म गुरुहरू अंकमाल गर्दै सदभावको सन्देश प्रवाह गरिरहेका भेटिन्छन् । भिन्न धार्मिक सम्प्रदायको बसोवास गर्ने शहरमा कुनै प्रकारको समस्या नआओ् भन्नका लागि नागरिकले गरिरहेको कामना धर्मगुरुहरूले पुरा गरिदिएका छन् ।
डा. बिनोद कर्ण पश्चिम नेपालकै चर्चित बरिष्ठ प्लाष्टिक सर्जन हुन । कार्यव्यस्थताकाबीच उनले नेपालगन्जमा सरसफाईको महाअभियान नै शुरु गरे । २०७२ सालमा डा कर्णले ‘क्लिन नेपालगन्ज, ग्रिन नेपालगन्ज’ नामक अभियान मार्फत नेपालगन्जमा बिरुवा लगाउन शुरु गरे । शहरीकरण बढ्दै जाने तर रुखबिरुवा नलगाउने प्रबृत्ति बढेका बेला कर्णले शुरु गरेको हरित अभियानले नेपालगन्जमा सार्थकता पाएको छ । कुनै प्रोजेक्ट बिनानै डा. कर्णले सयांै बिरुवा लगाइसकेका छन् । उनी स्वयं बिरुवा लगाउन दौडिन्छन् भने ती बिरुवाको हेरचाह समेत गर्छन । डा. कर्ण भन्छ्,–‘अहिले धेरै जना यो अभियानमा सहभागि भएको देख्दा खुसी लाग्छ ।’ डा कर्णका अनुसार सार्वजनिकस्थल मात्र नभई घर–घरमा बृक्षरोपण गर्ने गरिएको देख्दा आफ्नो अभियानले सार्थकता पाएको महसुस भएको उनले बताए ।
नरैनापुर– ५ मटैहीयामा रहेको विद्युत नो लाइटमा दक्ष र मिटर रिडीङ कर्मचारीको अभाव, समयमै र नियमित विद्युत महशुल बुझाउन नपाएको र एकमुष्ट जरिवाना असुली हुने गरेको लगायतका समस्या देखीएपछि संवाद समूह बाँकेको टोलीले नेपालगन्ज वितरण केन्द्रको ध्यानाकर्षण गरायो । विद्युत महसुल एक दिन मात्रै लिने गरेकोमा अब दुई दिन लिने वातावरण बनाइने प्रतिबद्धता व्यक्त गर्दै कर्मचारीको अभाव परिपूर्ति गर्ने र नियमित मिटर रिडिङ गर्ने व्यवस्था मिलाउन वातावारण बन्यो । यस्ता नागरिकका सय बढि मुद्दाको समस्या समाधानका लागि सहजिकरण गरिसकेको संवाद समूह बाँकेका संयोजक शुक्रऋषी चौलागाई बताउँछन् । प्रोजेक्टमा आधारित कार्यक्रम भए पनि संवाद समूहले नागरिकका आवाजहरू उठाउँछ । चौलागाई भन्छन्,–‘नागरिकका आवाज बोल्ने मात्रै होइन समस्या समाधानका लागि आवाज पनि उठाउँछौं ।’ महिला तथा बालबालिका त्यसमा पनि मुस्लिम एवं मधेसी समुदायका सवालमा निरन्तर आवाज बनिरहेको फातिमा फाउण्डेसन बाँके । मुस्लिम समुदायकै महिलाको अगुवाईमा संचालन भइरहेको यो संस्थाले महिला एवं बालबालिकाकाक्षेत्रमा आवाज उठाइरहेको छ ।
हाल अध्यक्ष रहेकी मैमुना सिद्धिकीलाई यो वर्षको भजनराम मानव अधिकार पुरस्कार प्रदान गरियो । कुनै संघसंस्थाले कार्यक्रम दिउन चाहे नदिउन आफुहरूले निरन्तर काम गरिरहेको उनी बताउछिन् ।