खोज

माण्डवी गाउँपालिकाले आर्थिक वर्ष २०७५÷०७६ मा खानेपानीलाई उच्च प्राथमिकता दिएर नीति, कार्यक्रम तथा बजेट ल्याएको छ । खानेपानीबीना हरेक क्षेत्र अपुरो हुने भएकाले स्वच्छ खानेपानी आपूर्तिलाई गाउँपालिकाले प्राथमिकतामा राखेको हो ।
तेस्रो गाउँसभाबाट ‘एक घर, एक धारा’ कार्यक्रम बनाइ कुल दुइ करोड नौ लाख १४ हजार रुपैयाँ बजेट विनियोजन गरिएको अध्यक्ष श्रीधर रोकामगरले जानकारी दिए । खानेपानी तथा सरसफाइको क्षेत्रमा गरी विभिन्न १८ वटा योजनाहरु चालु आर्थिक वर्षमा संचालन हुने उनले बताए । तिराममा ठूलोखोला पाङकोट लिफ्ट खानेपानी आयोजना, गोगनपानी लिफ्ट खानेपानी, सल्लीवेशी र लामाचौर चिसापानीमा ट्यांकी निर्माण, चकचके देविस्थान, जस्पुरमा बृहत खानेपानी आयोजना संचालन हुने पालिकाले जनाएको छ । यसअघि संचालन भएर जिर्ण बनेका खानेपानी योजनाहरुलाई पूर्न निर्माण गर्न समेत बजेट विनियोजन भएको छ ।
चोरपानी, चेरनेटा, ढुंगेधारा, सल्लीवेसी, सिरुवारी, सल्लीखर्क, दमारे, तिग्रा, आपचौर, धनचौर र वडेचौरमा एकघर, एकधारा खानेपानी आयोजना संचालनका लागि बजेट विनियोजन गरिएको छ । रम्दी आपचौरमा लिफ्ट आयोजना संचालन हुने छ । गाउँसभाले नीति तथा कार्यक्रममै ‘सफा र स्वच्छ खानपान, माण्डवीको पहिचान’ नारा बनाएर कार्ययोजना अघि ल्याएको छ ।
पाँचवटै वडामा खानेपानी आयोजना संचालन भएपछि अनुमानित पाँचसय घरधुरी प्रत्यक्ष लाभांवित हुने प्रमुख प्रशासकिय अधिकृत नारायण पौडेलले बताए । खानेपानीलाई प्राथमिकता दिएपछि जिल्लाको पूर्ण सरसफाई अभियानलाई सफल बनाउन टेवा पुग्ने पालिकाले आशा गरेको छ । यसअघि उदयपुरकोटको सिरुवारी गाउँ पूर्ण सरसफाईयूक्त घोषणा भइसकेको छ ।
अघिल्लो आर्थिक वर्षको तुलनामा सडक सञ्जाल निर्माणलाई कम प्राथमिकतामा राखिएको अध्यक्ष रोकामगरले बताए । खानेपानी, स्वास्थ्य र शिक्षापछि सडकलाई प्राथमिकतामा पारिएको उनको भनाई छ । कार्यान्वयन गर्ने खालका मात्र नीति तथा कार्यक्रमहरु अघि सारिएको उनले जनाए । गाउँसभाबाट कुल २२ करोड ९९ लाख १६ हजार रुपैयाँ बजेट विनियोजन भएको छ । एकिकृत सम्पत्ती कर, घरबहाल, जडीबुटी, जीवजन्तु लगाएत करबाट गरी ६३ लाख ३१ हजार रुपैयाँ आन्तरिक आय गर्न सकिने गाउँपालिकाले लक्ष्य राखेको छ ।