खोज

काठमाडौं ,२६ वैशाख । प्रतिनिधि सभा सदस्य बासुदेव घिमिरेले मुलुकको व्यापार घाटा कम गर्न नेपालका प्राकृतिक स्रोत साधनको भरपुर प्रयोग गर्नुपर्ने बताएका छन् । विनियोजन विधेयकका सिद्धान्त र प्राथमिकताबारे प्रतिनिधि सभा वैठकमा भएको छलफलमा भाग लिंदै सांसद घिमिरेले विश्वका विकसित मुलुकले प्राकृतिक स्रोत साधनको भरपुर प्रयोग गरेरै आर्थिक समृद्धि हासिल गरेको उल्लेख गरे ।
नेपालमा ढुंगा, गिट्टी र वन पैदावर जस्ता प्राकृतिक स्रोत साधनको व्यापक प्रयोग गर्न सक्ने संभावना रहेको उल्लेख गर्दै घिमिरेले वातावरणमा सकेसम्म कम असर पर्ने गरी चट्टानी श्रृंखला उत्खनन् गरेर ढुंगा निर्यात गरी ब्यापार घाटा कम गर्न सकिने बताए ।
उनले नेपालका वनहरुमा काठ कुहिएर गएका तर विदेशबाट वर्षेनी अर्बौंको फर्निचर आयात भइरहेको भन्दै आगामी नीति तथा कार्यक्रम र वजेटमा यस विषयमा अर्थमन्त्रीको ध्यानाकर्षण गराए ।
रुपन्देही ५ का सांसद घिमिरेले विदेशी मदिरा आयातमा रोक लगाई स्थानीय मदिराको ब्राण्डिङ गरी विश्व बजारमा पु¥याउन सकिने उल्लेख गरे । उनले विश्वका कतिपय देशमा गांजा खेतीलाई वैधानिकता दिएको भन्दै नेपालमा पनि यसबारे वहस हुनुपर्ने औंल्याए ।
सांसद घिमिरेले मुलुकलाई आर्थिक संकटबाट जोगाउन आयातमुखी नीति र भन्सार दररेट बदलेर उत्पादनशील क्षेत्रलाई प्रोत्साहित गर्ने गरी नीति तथा कार्यक्रम र वजेट ल्याउन सुझाव दिए । मुलुकमा आर्थिक संकट आई आम जनता आर्थिक मन्दीको शिकार भइरहंदा केही मुठ्ठीभर ब्यापारिक घरानाको सम्पत्ति अस्वभाविक रुपमा बढ्दै जानुको कारण नीतिगत विचलनका माध्यमबाट दलाल नोकरशाही पुंजिवादको वर्चश्व कायम हुंदै गएको सांसद घिमिरेले उल्लेख गरे ।
सांसद घिमिरेले आगामी नीति तथा कार्यक्रम र वजेट उत्पादनशील क्षेत्रलाई बलियो बनाउने गरी वैज्ञानिक, वस्तुनिष्ठ र यथार्थपरक ढंगले ल्याउनुपर्ने बताए ।
सांसद घिमिरेले राष्ट्रिय आत्मनिर्भर कार्यक्रम र लुम्बिनी विशेष समृद्धि कार्यक्रम सञ्चालन गर्न, बैंक ब्याज दर एक अंकमा झार्न,पुर्व विशिष्टहरुको सुविधा खारेज, अनुत्पादक चालु खर्च घटाउने,समानान्तर कार्यालयहरु खारेज,संसद वैठकको संख्या भन्दा समय बढाउन माग गरे ।

बुटवल—नारायणगढ सडक यथाशीघ सम्पन्न गराउन ध्यानाकर्षण

घिमिरेले बुटवल—नारायणगढ सडक यथाशीघ्र निर्माण सम्पन्न गराउन सरकारको ध्यानाकर्षण गराएका छन् । मंगलबार प्रतिनिधिसभा बैठकको शून्य समयमा बोल्दै सांसद घिमिरेले समयमैं निर्माण सम्पन्न नहुँदा धुलोले स्थानीय बासिन्दा र यात्रुहरुको स्वास्थ्यमा गम्भीर असर परेको उल्लेख गरे ।
सडक निर्माणमा ढिलाइ हुँदा यात्रुहरू अत्यन्त कष्टकर यात्रा गर्न बाध्य भएको बताउँदै सांसद घिमिरेले सडकको हैसियत बिग्रिँदा ३ घण्टामा सकिने सडक यात्राको लागि अहिले ७ घण्टासम्म लाग्ने गरेको बताए । बिग्रिएको सडक भएकोले सवारीसाधनले पेट्रोलियम पदार्थ बढी खपत गर्दा र बिग्रिँदा प्रत्यक्ष÷अप्रत्यक्ष रुपमा करोडौं रकम विदेशिएको सांसद घिमिरेको भनाइ छ ।
पूर्वपश्चिम राजमार्गको सबैभन्दा व्यस्त बुटवल—नारायणगढ सडक खण्डमा दैनिक साना—ठूला ५० हजारभन्दा बढी सवारीसाधन गुड्छन् । गत साउन महिनाभित्र निर्माण सक्ने गरी चाइना स्टेट कन्स्ट्रक्सन इन्जिनियरिङ कर्पोरेसनले २०७५ माघ २४ गते यो सडक विस्तारको ठेक्का सम्झौता गरेको थियो । तर, सम्झौताको चार वर्ष बितिसक्दा ११४ किलोमिटरको यो सडकको ३० प्रतिशत काम मात्र पूरा भएको छ ।