खोज

बुटवल,२५ बैसाख ।   हस्पिटालिटी क्षेत्रमा नेपालमै नौलोपन दिने गरी तिलोत्तमामा ५० करोड लगानीमा तीनतारे होटेल मोनामो प्यालेस सञ्चालनमा आउन लागेको छ ।

भलबारीबाट पश्चिम–दक्षिण पुरानो सडकमा १५ कठ्ठा क्षेत्रफलमा मोनामो प्यालेस निर्माणको अन्तिम चरणमा रहेको छ । यो होटेलको मुख्य आकर्षण र विशेषता पानी पोखरीमाथि २५० जना क्षमताको रेष्टुरेन्ट र भिल्लाहरु हुन् ।

होटेलको अर्को विशेषता गर्मी याममा पूर्ण शितलताको अनुभूति दिलाउन होटेल परिसरको ६० प्रतिशत भागमा पानी पोखरी र आकर्षक एक दर्जन वाटर फाउन्टेनहरु हुने छन् । वाटर फाउन्टेनहरु म्युजिकल हुने छन् ।

हालसम्म नेपालका तारे होटेलमा ठूलो क्षेत्रफलमा पानी पोखरी, वाटर फाउन्टेनहरु र त्यसमाथि ठूलो क्षमताको रेष्टुरेन्ट र भिल्लाहरु बनेका छैनन् । होटेललाई हरियालीयुक्त बनाउन ग्रिनरीमा समेत फोकस गरिएको छ ।

होटेलमा एक्जुकेटिभ स्वीट रुम, सुपर डिलक्स र डिलक्स गरी ४० वटा रुमहरु तथा ६० जना क्षमताका ३ वटा प्राइभेट डाइनिङ रुम, कन्फेरेन्स हल,ओपन र कभर्ड रेष्टुरेन्ट लगायतका संरचना रहने होटेलका जनरल म्यानेजर सागर घिमिरेले बताए ।

होटेलले बुटवल र भैरहवाका होटेलले हालसम्म दिन नसकेका खानाका परिकार पनि पर्यटकलाई पस्कने तयारी गरेको छ । नेपाली,इण्डियन,कन्टिनेन्टल,अरबी,टर्किस सहित कम्तीमा १० देशका खानाका परिकार, आफ्नै ब्राण्डको बेकरी र क्याफे पनि सञ्चालन हुने जनरल म्यानेजर घिमिरेले जानकारी दिए ।

एक महिनाभित्र सञ्चालनमा ल्याउने गरी अन्तिम चरणको निर्माणको काम तीब्र पारिएको होटेलका सञ्चालक विष्णु भुसालले बताए ।
आन्तरिक र खासगरी भारतको गोरखपुर र लखनउका पर्यटकलाई लक्षित गरेर नेपालमै नौलोपनको तारे होटेलमा लगानी गरेको भुसालले बताए ।
दोस्रो चरणमा थप एक अर्ब लगानीमा थप ६० वटा कोठा, क्यासिनो,२ हजार जना क्षमताको बैंक्वेट हल, स्वीमिङ पुल र विद्युतीय गाडीको लागि चार्जिङ स्टेशन बनाउने तयारी रहेको सञ्चालक भुसालले बताए ।

उक्त बैंक्वेट हल स्थानीयलाई मात्र नभई भारतीयको विवाह उत्सवको पार्टीका लागि यो ठाउंमा आकर्षिग गर्दै वेडिङ डेस्टिनेसन बनाउने लक्ष्य रहेको भुसालले बताए ।

‘नेपालमा संभावना भएको क्षेत्र पर्यटन हो, विश्वकै धेरै जनसंख्या भएको छिमेकी मुलुक भारतका नागरिक र पर्यटकलाई चाहे जस्तो सेवा सुविधा र सम्मान दिन सकियो भने उनीहरुलाई आकर्षित गर्न सकिन्छ भन्ने विश्वासले हस्पिटालिटी क्षेत्रमा नौलोपन दिंदै लगानी गरेका हौं’–भुसालले भने–‘सरकारी निकायले सीमा नाकामा भारतीय पर्यटकलाई सम्मानजनक व्यवहार र विना झन्झट आवत जावतको व्यवस्थाका लागि नीतिगत सुधार गर्ने हो भने धेरै भारतीय यहां आएर खर्च गर्ने संभावना छ ।’
सरकारको नीति पर्यटनमैत्री हुने हो भने रुपन्देहीलाई क्यासिनो हब बनाउन सकिने र त्यसबाट नेपालले राम्रो आम्दानी गर्न सक्ने संभावना भुसालले औंल्याए ।

पहिलो चरणमा डेढ सय जनाले रोजगारी पाउने र दोस्रो चरणका पुर्वाधार बनेपछि एक हजार जनाले रोजगारी पाउने सञ्चालक भुसालले बताए । बुद्ध जन्मस्थल लुम्बिनी,गौतमबुद्ध विमानस्थल र बुटवलबाट नजिक साथै पांचतारे होटेल टाइगर प्यालेसबाट  २ किलोमिटर उत्तरमा होटेल बनेकाले आवागमनका लागि सहज र  शान्त वातावरणमा रहेकाले पनि आन्तरिक र वाह्य पर्यटकको रोजाई मोनामो प्यालेस बन्ने विश्वास लिएको सञ्चालक भुसालले बताए ।

तस्वीरहरु होटेलको आर्किटेक्ट डिजाइन हुन् ।