खोज

बुटवल,२० बैसाख ।    सरकारको नीति तथा कार्यक्रम, बजेट र सरकारलाई पूर्णता दिने लगायत समसामयिक विषयमा छलफल गर्न सत्ता गठबन्धनका प्रमुख दलको बैठक बुधबार अपराह्न बस्ने भएको छ। बैठक दिउँसो साढे ३ बजे प्रधानमन्त्री निवास बालुवाटारमा बस्नेगरी बोलाएको प्रधानमन्त्रीका प्रेस संयोजक सूर्यकिरण शर्माले बताए। प्रधानमन्त्री पुष्पकमल दाहालले आठ पटक मन्त्रिपरिषद् विस्तार गर्दा पनि अझै सरकारलाई पूर्णता दिन सकेका छैनन्।

आर्थिक वर्षका लागि सरकारले जेठ १५ गते संसदमा बजेट पेश गर्नुपर्ने संवैधानिक व्यवस्था छ।

पछिल्लो पटक प्रधानमन्त्री प्रचण्डले राष्ट्रिय स्वतन्त्र पार्टी रास्वपालाई साविककै मन्त्रालय दिएर सरकारमा ल्याउन पहल गरिरहेकाले आजको बैठकमा यो विषयमा पनि छलफल हुनेछ।

प्रधानमन्त्रीको सकारात्मक जवाफ पाएको रास्वपाले गठबन्धनको निर्णय पर्खिएको छ। समर्थन गरेर मात्रै नबस्ने भन्दै रास्वपाले शुक्रबार बैठक बसेर सरकारमा जाने कि प्रतिपक्षमा बस्ने भन्नेबारे निर्णय गर्ने बताएको छ।

कांग्रेसले आफ्नो भागमा परेका तीन मन्त्री अझै पठाएको छैन भने जसपाले पनि एकजनाको नाम दिन बाँकी छ । प्रचण्डले रास्वपालाई सरकारमा ल्याउने तयारी गरेका छन् ।