खोज

बुटवल, १९ बैशाख ।  तिलोत्तमा नगरपालिका–८ प्रदीपनगरका स्थानीयले योगीकुटी–धकधई ३३ केभी डबल प्रशारण लाइनका तारलाई भूमिगत गर्न माग गरेका छन् ।
हाइटेन्सन लाइनका कारण करिब दुई सय घरपरिवार र संगै रहेको जनभावना माविका एक हजार विद्याथी–शिक्षक आगलागीको जोखिममा परेको भन्दै स्थानीयले तार भूमिगत गर्न माग गर्दै नगर प्रमुख रामकृष्ण खांणलाई मंगलबार ज्ञापनपत्र बुझाएका छन् । सयौं विद्यार्थी र स्थानीय दिनहुं हिंड्ने विद्यालय पुग्ने बाटोमाथि हाइटेनसन लाइन रहेकोले स्थानीय बासिन्दा त्रासमा रहेका छन् ।

प्रशारण लाइन विस्तार गर्ने क्रममा पनि स्थानीयले भूमिगत गर्न माग गर्दै आन्दोलन गरेपनि प्रहरी प्रशासनको बल प्रयोग गरेर जबरजस्ती गरिंदा सिंगो गाउं नै जोखिम र त्रासमा परेको स्थानीय डिल्लीराज भण्डारीले बताए । ‘पटक पटक हाइटेन्सन तार पड्किंदा इन्टरनेटको केबल तारमा आगलागी भइरहेको छ, तार भूमिगत नगर्ने हो भने विद्यालय र सिंगो गाउं ठूलो दुर्घटनामा पर्छ’–भण्डारीले भने ।
ज्ञापनपत्र बुझ्दै नगर प्रमुख खांणले स्थानीयका माग सम्बोधन गर्न पहल गर्ने बताए । नगरवासीलाई सुरक्षित बनाउने विषयमा आफू गम्भरि रहेको भन्दै नगर प्रमुख खांणले यस विषयमा विद्युत प्राधिकरणका कार्यकारी निर्देशक कुलमान घिसिङसंग पनि कुरा राख्ने बताए । तत्कालका लागि इन्टरनेट कम्पनीका केबल तारहरु हटाउन लगाउने खांणले बताए ।
सो अवसरमा तिलोत्तमा ८ का वडाध्यक्ष कृष्ण पौडेलले उक वर्ष अघि नै तार भूमिगत गर्न मा गर्दै वडा र नगरपालिकाले नेपाल विद्युत प्राधिकरणमा पत्राचार गरेपनि सुनुवाई नभएको बताए । चट्याङ पर्दा, मौसम खराबी हुंदा र हाइ भोल्टेज आउंदा हाइटेन्सन लाइनमा आगलागीको जोखिम र विद्युतीय सामानहरु समेत जल्ने र पड्किने हुन्छ ।

सोमबार बिहान हाइटेन्सन लाइन पड्किंदा इन्टरनेट केबल तारमा आगलागीसंगै स्थानीय देविराम खनालको घरमा फ्रिजमा आगलागी र अन्य दुई घरका विद्युतीय सामानमा क्षति भएको थियो । रातको समयमा यस्ता घटना भएमा ठूलो क्षति हुनसक्ने भन्दै स्थानीयले तार भूमिगत गर्ने प्रकृया अघि नबढाएसम्म चरणवद्ध आन्दोलन गर्ने जनाएका छन् ।