खोज

बुटवल,२३ चैत । होटल तथा रेष्टुरेण्ट व्यवसायी संघ रुपन्देहीको नयाँ नेतृत्वका लागि बाबुराम गौतमको नेतृत्वको प्यानलले व्यवसायीको हक हितमा १२ बुंदे प्रतिवद्धता सार्वजनिक गरेको छ । चैत्र २४ गते हुने २२औं साधारणसभा र २५ गते हुने ११ औं अधिवेशनमा आफूले अघि सारेका १२  प्रतिवद्धताहरु गौतम प्यानलले बिहीबार पत्रकार सम्मेलन गरि सार्वजनिक गरेको हो ।

गौतम प्यानलले सचिवालय भवनको स्तर उन्नति गरी अध्याधुनिक हल निर्माण गर्ने, कल्याणकारी कोषलाई व्यवस्थित गर्ने, संघमा आवद्ध होटल तथा रेष्टुरेण्ट व्यवसायीहरुलाई समेटेर सहकारी संस्था स्थापना गर्ने, पर्यटन मन्त्रालयसँग सहकार्य गरी पर्यटन सूचना केन्द्र स्थापना गर्ने लगायतका प्रतिवद्धता रहेका अध्यक्षका उम्मेदवार बाबुराम गौतमले बताए । यसैगरी आर्थिक मन्दीका कारण मारमा परेका व्यवसायीलाई राहत पुग्ने गरी सरकारसँग राहत प्याकेजको माग गर्ने, घर भाडा दर घटाउन घरबेटी र सरोकारवालासँग पहल गर्ने, सडक खाना महोत्सव नेपाली नयाँ वर्ष र अंग्रेजी नयाँ वर्ष गरी वर्षमा २ पटक गर्ने, रक्तदान कार्यक्रम संघको आफ्नै समूह बनाई अझै व्यवस्थित बनाउने , व्यवयासी गुनासो तथा सुझाव पेटिका राख्ने प्रतिवद्धतामा उल्लेख छ।

त्यस्तै दोहोरो तेहोरो कर प्रणालीलाई एकद्वार कर प्रणालीको लागि पहल गर्ने, व्यवसायिक समस्या समाधान गर्नका लागि कार्यालयमा हेल्प डेक्स निर्माण गर्ने र रात्री कालिन व्यवसाय संचालन गर्न संघ, प्रदेश र स्थानीय सरकारसँग पहल गरी २४ सै घण्टा होटल तथा रेष्टुरेण्ट सेवा संचालन गर्नको लागि पहल गर्ने अध्यक्ष उम्मेदवार गौतमले बताए ।

गौतमले आफू संघमा वरिष्ठ उपाधयक्ष रहेकाले स्वभाविक हिसाबले अध्यक्षमा उम्मेदवार भएको र आफ्नो प्यानलमा सबै राजनीतिक दल,समुदाय,क्षेत्रमा आवद्ध व्यवसायीको साझा, समावेशी , परिपक्व र अनुभवी व्यवसायीको प्यानल भएको बताए ।

गौतम प्यानलबाट वरिष्ठ उपाध्यक्षमा माधव खनाल, पर्यटन उपाध्यक्षमा रोमाकान्त पाण्डे, प्रथम उपाध्यक्षमा टंक प्रसाद पराजुली ९प्रकाश०, द्वितीय उपाध्यक्ष खेमराज ज्ञवाली, महासचिवमा मोहनलाल पाण्डे, सचिव डिल्लीराज अर्याल, सहससचिव मोहन बस्याल, सह कोषाध्यक्ष माधव ढकाल उम्मेदवार रहेका छन् ।

सदस्यहरुमा एक बहादुर गाहा मगर, एकादेव पाण्डे, तिरास लाम्टाङ्गे मगर, दामोदर पौडेल, धनकुमारी शर्मा, नारायण प्रसाद श्रेष्ठ, बाबुराम अर्याल, मुरारी पाण्डे, यज्ञमुर्ती भण्डारी, सीता ढकाल र सुन्दरकुमार श्रेष्ठ रहेका उम्मेद्वार रहेका छन् ।

संघको कोषाध्यक्ष पदमा गौतम प्यानलबाट राम बहादुर न्यौपाने निर्विरोध निर्वाचित भैसकेका छन् ।
संघमा १२ सय ३ जना व्यवसायी आवद्ध रहेका छन् ।
प्रतिवद्धता सार्वजनिक कार्यक्रममा पुर्व अध्यक्ष माधव नेपाल,महेन्द्र श्रेष्ठ, समुन्द्र जीसी लगायतले संघलाई एकतावद्ध बनाई राजनीतिक हस्तक्षेप हुन नदिन गौतमको प्यानलको जित आवश्यक भएको बताए ।