खोज

बर्दघाट उद्योग वाणिज्य संघ नवलपरासीको आयोजनामा कार्तिक ३० गते (आज) देखि मंसिर ११ गतेसम्म तेस्रो कृषि, पर्यटन तथा औद्योगिक ब्यापार मेला २०७५ बर्दघाटको चिसापानीमा सुरु हुँदैछ । ब्यापार मेलाको सन्दर्भमा बर्दघाट उद्योग वाणिज्य संघका अध्यक्ष एवं मेलाका संयोजक मिनराज शर्मासँग गरिएको कुराकानीको सम्पादित अंश ।

मिनराज शर्मा
अध्यक्ष तथा मेला संयोजक, बर्दघाट उद्योग वाणिज्य संघ, नवलपरासी

तेस्रो पटक मेलाको आयोजना गर्नु भएको छ । ब्यवशायी र सम्बन्धित सरोकारवालाहरूबाट कस्तो प्रतिक्रिया पाउनु भएको छ ?
हामीले तेस्रोपटक आयोजना गरेको मेला पूर्ण सफल हुन्छ भन्नेमा विश्वस्त रहेका छौँ । मैले यस्तो भनिरहँदा गतवर्षलाई पनि फर्केर हेर्न जरुरी छ । विगतका वर्षहरूमा केहि व्यवस्थापकिय कमजोरीहरू भएका थिए । हामीले क्रमिक सुधार गर्दै गइरहेका पनि छौँ ।
पहिलो वर्षको तुलनामा गत वर्ष निकै सफल भयो र यो वर्ष त्रुटिरहित तवरले मेला सम्पन्न हुनेछ भन्नेमा आशावादी छौँ । साथै हामीले स्थानिय ब्यवशायी, उद्योगी र स्थानिय अवलोकनकर्ताको सल्लाह सुझावलाई समेत मनन गर्दै सोहि अनुसार मेला आयोजना गर्दै आएका छौँ ।

स्थानीय ब्यवशायीलाई उपेक्षा गरियो भन्ने विगतका वर्षमा आरोप लागेको थियो ।यसवर्ष कसरी ब्यवस्थापन गर्नु भएको छ ?

हामीले आयोजना गरेको मेला महोत्वस सफल पार्न संघका सदस्य ब्यवशायी साथीहरूको सबैभन्दा ठूलो हात हुन्छ । आफ्नै सँस्थाले आयोजना गरेको महोत्सवमा स्थानिय ब्यवशायी र उद्योगीहरूको स्टलको लागि पहिलो प्राथमिकता दिएका छौँ । सबैलाई सबैले रोजेको स्टल त पक्कै पनि उपलब्ध गराउन गाह्रो हुन्छ तथापि हामीले निश्चित कोटा स्थानियको लागि छुट्याएर स्टल वितरण गरेका छौ ।

यसवर्षको मेलामा नयाँपन के रहेको छ ?
ब्यापार मेला महोत्सव भन्ने वित्तिकै उपभोग्य सामानको विक्रि, नयाँ उत्पादनको प्रदर्शनी, बालउद्यानको रमाइलो र सांगितिक माहौल नै हो तथापि हामीले यि कुराहरू सँगसँगै चिसापानी सामुदायिक वनसँग समन्वय गरेर ¥याफ्टीङ्ग बोटमा बोटिङ्गको सुविधा, (बल्छी खेल्ने) फिसिङ्गको ब्यवस्था गरेका छौ । हामीले गरेको मेला आयोजनाको उद्देश्य पर्यटन प्रवर्धन समेत हो । पर्यटन प्रवर्धनका लागि पर्यटन ब्यवशायीसँग समन्वय गरी नवलपरासीका धार्मिक तथा पर्यटकिय स्थलको भ्रमण गर्न चाहनेहरूको लागि भ्रमणको ब्यवस्था समेत मिलाएका छौँ । यो पटक पर्यटकिय स्थलको रूपमा रहेको संसारकोटबाट दृष्यावलोकनको ब्यवस्था समेत गरेका छौँ ।

स्थानीयस्तरका ब्यवशायी, ब्यापारी र उद्योगीहरू कसरी लाभान्वित भएका छन् ?
औद्योगिक हिसाबले बर्दघाट विकसित क्षेत्रको रूपमा पर्दैन । स्थानीयस्तरमा ठूला उद्योगहरू यहाँ छैनन र स्थानीयस्तरका उद्योगहरूको सहभागिता रहेको छैन तथापि यो मेलामा स्थानीय ब्यवशायी, साना उद्योग, हस्तकला, शिल्पकला र कृषिजन्य उपजको एकैठाँउमा प्रदर्शन गर्न पाउँदा भोलीका दिनमा ब्यवशाय विस्तारको सम्भावना रहेको छ ।
जारी मेलामा हामीले स्थानिय ब्यवशायीलाई प्राथमिकतामा राखेर स्टल उपलब्ध गराउँदा उहाँहरूको ब्यवशायमा वृद्धि भएको छ भने सँघका सदस्य ब्यवशायीलाई स्टलमा समेत २५ प्रतिशत छुटले स्थानीय ब्यवशायीको आकर्षण समेत बढेकोछ ।

कृषि पर्यटनको नारा राखी मेला आयोजना गर्ने तर कृषिलाई उपेक्षा गरियो भन्ने आरोप पनि छ नी ?
गतवर्ष हामीमा अनुभव नभएका कारण केहि कमजोरी पक्कै भएको हो त्यो कमजोरी संघले स्विकार्छ तर अहिले जारी मेलामा हामीले स्थानियलाई नै प्राथमिकतामा राखेका छौँ ।
हाम्रो यस बर्दघाट क्षेत्र कृषि क्षेत्रमा अग्रणी स्थानमा रहेको छ । कृषिकै लागि भनेर अधिकतम स्टलहरू पनि राखिएको छ । साथै कृषि क्षेत्रका कुनै पनि उत्कृष्ट उत्पादनलाई पुरस्कृत समेत गरेर उनीहरूको हौसला बढाउन पुरस्कारको समेत ब्यवस्था गरेका छौँ । सायद यो वर्ष कृषि क्षेत्रलाई प्राथमिकतामा राखेको कारण विगतमा लागेको आरोप यसवर्ष लाग्ने छैन ।

अन्त्यमा के भन्न चाहनु हुन्छ ?
बर्दघाट ब्यापार मेला हामी सबैको साझा कार्यक्रम हो । बर्दघाट मेला सफल सम्पन्न गर्ने हामी सवैको दायित्व पनि हो । सबैको सहयोग र सदभावले तेस्रो पटक मेला सुरु भएको छ । मेला अवलोकन गरेर भएका कमीकमजोरी औल्याइ आगामी दिनको लागि मार्गनिर्देश गर्नुहुन र मेला सफल पार्न सहयोग गर्नुहुन सबैमा अनुरोध गर्न चाहान्छु साथसाथै मेला सफल पार्नको लागि ब्यवशायी, उद्योगी, अवलोकनकर्ता संचारमाध्यम, स्थानिय निकाय, सुरक्षा निकाय लगायत सबैले गर्नुभएको सहयोगको लागि धन्यवाद दिन चाहान्छु ।