खोज

नेपालगञ्जदेखि राप्तीपारी नरैनापुर गाउँपालिका कट्कुइयासम्म निर्माणाधिन हुलाकी राजमार्गमा नक्सांकन बिबाद देखिएको छ । हुलाकी राजमार्ग अन्तर्गत नरैनापुर गाउँपालिका वडा नं.५ मटेहियास्थित सडक खण्डमा सर्भे र नापी भएपनि सो बिपरित सडकमा निर्माण कार्य भएपछि बिबाद उत्पन्न भएको हो ।
नेपाल सरकारकै लगानीमा हुलाकी सडक आयोजनाले ४४ किलोमिटर सडक २ खण्डमा विभाजित गरेर २०७३ फागुनदेखि निर्माण थालेको हो । निर्माण कार्य ०७६ असार मसान्तसम्म पूरा गर्नुपर्ने समयसीमा रहेको छ । आयोजना, निर्माण कम्पनी र स्थानीय जग्गाधनीहरू बीच नक्सांकनकै विवादले वैशाखदेखि निर्माण कार्य ठप्प छ भने द्वन्द्वको स्थिति छ ।
सरोकारवाला निकायले बाँके क्षेत्र नं. १ (क) का प्रदेश सभा सदस्य कृष्णा केसी (नमूना) मार्फत भौतिक पूर्वाधार विकास मन्त्रालयलाई ज्ञापन पत्र दिएको छ । सम्बाद समूहका तर्फबाट सहजकर्ता शुक्रऋषि चौलागाईद्वारा हस्ताक्षरित ज्ञापनपत्रमा सडक नक्सांकनको विवाद बहुपक्षिय र सरकारसँग जोडिएको कानूनी र प्राविधिक विषय भएकाले सोही अनुसारको पहल गरिनुपर्ने आवश्यकतासहितको माग गरिएको छ ।
समूहको टोलीले प्रमुख जिल्ला अधिकारी मदन भुजेललाई समेत भेटर सो विषयमा ध्यानाकषर्ण गराएको छ । हुलाकी राजमार्गको पुर्व र पश्चिमतर्फ सडक ग्रावेल बनीसकेको छ भने अवरोध सो खण्डको ३ सय मिटर बाटो खाल्डा खुल्डीकै स्थितीमा छ । निर्माण रोकिएपछि सहज आवात जावतमा समस्या परेको छ भने हजारौं जनता पीडीत छन् । आम जनताको सार्वजनिक चाँसो र अत्यावश्यक विषय भएकाले अविलम्व निकास खोज्न चौतर्फी दबाब रहेको छ ।