खोज

अन्तर्राष्ट्रिय पर्यटकीय स्थल लुम्बिनीलाई शान्तिको हब बनाउने चर्चा चलिरहेको बेला पबित्र धार्मिक स्थल बुद्धको जन्मभूमि लुम्बिनी वरिपरि मासु, मदिरा बिक्री बितरणमा रोक लगाउन माग गरिएको छ । खुलेयाम बिक्री बितरण भइरहेको मासु र मदिराका कारण बुद्धजन्मस्थल वरिपरि दुर्गन्धित बनेको भिक्षुहरूको भनाइ छ । लुम्बिनीको पडरिया, पर्सा, महिलवार र तेनुहवा आसपासका क्षेत्रमा मासु, मदिरा बिक्री बितरण कार्यमा रोक लगाउन आवश्यक रहेको लुम्बिनी नागरिक समाजका संयोजक भिक्षु सागरधम्मको भनाइ छ ।
पर्यटकहरू बेलहिया प्रवेश गर्ने बित्तिकै मदिराको होर्डिङ्गबोर्ड खसी, बंगुर र कुखुराको साप्रा झुण्डयाईएको फोटो खिच्न बाध्य भइरहेको अवस्थामा त्यसलाई निषेध गरि धार्मिक गतिविधि झल्किने वातावरणको सिर्जना गर्नुपर्ने राजकीय बौद्ध बिहारका प्रमुख भिक्षु समेत रहेका भिक्षु धम्मको सुझाव रहेको छ ।
बुद्धजन्म स्थल लुम्बिनी वरिपरि मासु, मदिरा बिक्रीबितरण माथि प्रतिबन्ध लगाउन साउन महिनाको अन्तिम साता लुम्बिनी साँस्कृतिक नगरपालिका र लुम्बिनी बिकास कोषको संयुक्त बैठकले निस्कर्ष समेत निकाली सकेको हँुदा कार्यन्वयन गराउन खुल्ला बहस गर्ने गृहकार्य भईरहेको मेयर मनमोहन चौधरीले जानकारी गराए ।
यद्यपि राज्यद्वारा नै मासू मदिरा बिक्री बितरण गर्ने ईजाजत पाएका ब्यवसायीहरूलाई प्रहरीले निश्चित समय तोकेर तत्काल बिक्री बितरण गर्न लगाइएको ईलाका प्रहरी कार्यालय लुम्बिनीका प्रहरी निरीक्षक शंकर पोखरेलले बताएका छन । केही महिना अगाडी प्रहरीले एक सय भन्दा बढी लिटर घरेलु मदिरा बिभिन्न होटेल तथा रक्सीभट्ठीमा छापा मारि नष्ट समेत पारिएको उनले दाबी समेत गरे ।
त्यसै गरि लुम्बिनीलाई मासु, मदिरा निषेधित बनाउने अभियानकै रूपमा सबैसँग हातेमालो गरि अघि बढेमा मात्रै सफलता प्राप्त हुने लुम्बिनी बिकास कोषका उपाध्यक्ष भिक्षु मेत्तेईयले बताए । देशबिदेशबाट आउने धार्मिक पर्यटकहरू मासु, मदिरा लुम्बिनीमा छयाप्छयाप्ती बिक्री बितरण देखेर मन खिन्न पारी स्वदेश फर्किन थालेको कोषका उपाध्यक्ष भिक्षु मेत्तेईयले बताए ।