खोज

नेपाल युवा संस्था संजाल (आयोन) कर्णाली प्रदेशले आईतबार कर्णाली प्रदेश सरकारका सामाजिक विकास मन्त्री दल रावललाई पाँच बुँदे मागपत्र बुझाएको छ । देशभर बालीकाहरू माथी भएका बलात्कार तथा हिंसाका घटना बढ्दै गर्दा कर्णाली प्रदेशमा यस्ता खालका घटना हुन नदिनको लागी पहल गर्नु पर्ने भन्दै संथाले मागपत्र बुझाएको आयोन कर्णाली प्रदेशका संयोजक चरित्राकुमारी केसीले बताएकी छन् । आयोन कर्णाली प्रदेशको सदस्य संस्था मानवअधिकार तथा ग्रामीण वातावरण संरक्षण केन्द्र (हुरेक नेपाल), सामाजीक विकास तथा प्रर्वद्धन केन्द्र सुर्खेत, ग्रामिण विकास नेपाल कालीकोेट लगाएत युवाका क्षेत्रमा काम गरिरहेका दर्जन बढि संस्थाहरूले समेत यस कार्यमा यक्यवद्धता जनाएका छन् ।
स्थानिय तहका टोलटोलदेखी सबै ठांउमा बलात्कार बिरुद्धको अभियान संचालन गर्नुपर्ने, आम जनमानस देशको सुरक्षा व्यवस्थाप्रती विश्वस्त हुन सक्ने कार्यको सुनिश्चितता गर्नुपर्ने, कानुनले कसैलाई पनी विभेद नगरी दोषीलाई सजाय र पिडितलाई यथासक्य न्यायको आभाष दिलानुपर्ने भन्दै कर्णाली सरकारका सामाजिक विकास मन्त्रीलाई मागपत्र बुझाईएको छ ।
त्यस्तै यौन तथा प्रजनन स्वास्थ्य अधिकारका कुराहरू पाठ्यक्रममा समावेश गरि हरेक तहका कक्षामा पढनपाढन गरिनुपर्ने साथै विद्यालय बाहिर रहेका बालबालीकाहरूलाई समेत यससम्बन्धि तालीमको व्यवस्था र आत्मरक्षाको तालीम दिईनुपर्ने र यौनजन्य तथा महिला विरुद्ध हुने हिंसाको अन्त्य गर्न प्रदेश सरकार र स्थानिय सरकारले आ–आफ्नो क्षेत्रमा नीति तथा कार्यक्रमको निर्माण गरि प्रभावकारी कार्यान्वयन गर्नुपर्ने भन्दै पाँच बुंदे मागपत्र बुझाएको हो ।
नेपाल युवा संस्था संजाल आयोन कर्णाली प्रदेशको माागपत्र बुुँदै कर्णाली प्रदेश सरकारका सामाजीक विकास मन्त्री दल रावलले आयोनले बुझाएको मागपत्रप्रती गम्भिर ध्यानाकर्षण भएको बताएका छन् । उनले भने ‘ बलात्कारीलाई मृत्यु दण्ड दिईनुपर्ने हो तर त्यसमा नेपालको संविधान र विभिन्न अन्तर्राष्ट्रिय सम्झौतामा हस्ताक्षर गरेकोले मिल्दैन । बलात्कारीलाई बाँचुन्जेल जेलमा सड्न दिनु पर्छ ।’ कर्णालीमा जनता ढुक्क हुने वातावरण हामी तय गर्नेछौं । उनले थपे ‘कर्णाली प्रदेश सरकारले बलात्कार तथा हिंसाजन्य अपराध नियन्त्रणमा जनचेतना मुलक कार्यक्रमका लागी बजेट समेत छुट्टाएको छ । ’
सामाजीक विकास मन्त्री दलरावललाई मागपत्र बुझाएपछि पत्रकारहरूसंग बोल्दै आयोन कर्णाली प्रदेशकी संयोजक साथै मानब अधिकार तथा गा्रमीण वातावरण संरक्षण केन्द्र (हुरेक नेपाल) की कार्यक्रम व्यवस्थापक चरित्राकुमारी केसीले भनिन् ‘कञ्चनपुरमा १३ वर्षीय किशोरी निर्मला पन्तको बलात्कार पछि हत्या, पोखराकी १३ वर्षीया किशोरी बेपत्ता र दुईदिनपछि शव भेटिनु जस्ता घटना सामान्य भएका छन् । यस्ता खालका घटनामा सरकारको ध्यान जाओस् भनी मागपत्र बुझाएका हौं ।’ उनले थपीन् ‘ देशभरमा गत आर्थीक वर्षमा १४ सय ८० बलात्कारका घटना भएको प्रहरीको तथ्याङ्क छ । यो हिसाबले दिनमा चारवटा घटना पर्न आउँछ । यसमा सरकारको गम्भिर ध्यान हुनुपर्छ । हामी र हाम्रा छोरीहरूको सुरक्षाको ग्यारेण्टी अब सरकारले लिनुपर्छ ।’