खोज

इलाका प्रशासन कार्यलय चन्द्रौटाबाट आर्थिक वर्ष २०७४।०७५ मा ५ हजार ९ सय ५० जनाले नयाँ नागरिकता पाएका छन् । एक वर्षको अवधिमा बंसजकै आधारमा नागरिकता लिने सबैभन्दा बढी रहेको शाखा अधिकृत जगदीश अर्यालले जानकारी दिए ।
अर्यालका अनुसार बंसजकै आधारमा नागरिकता लिने ५ हजार ३ सय ९८ जना रहेका छन् । यस्तै ५ सय ५० ले वैवाहिक अंगीकृत र २ जना अंगीकृत नागरिकता लिएका छन् –उनले भने । चन्द्रौटा प्रशासनबाट १ हजार १४ जनाले प्रतिलिपि नागरिकता प्राप्त गरेको अर्यालले जानकारी दिए । त्यस्तै ४४ जनाले नाबालक परिचय पत्र, ५ सय ३९ जनाले दलित जनजाति प्रमाणित, ५ सय २९ जनाले विविध प्रमाणित गरेको अर्यालले बताए । इलाका प्रशासन कार्यालय चन्द्रौटामा एक वर्षको अवधिमा १ सय २४ वटा ठाडो उजुरी आएको अर्यालले बताए । शाखा अधिकृत अर्यालकै नेतृत्वमा एक वर्षको अवधिमा ११ पटक वजार अनुगमन गरेको जनाइएको छ । वैवाहिक अंगीकृत नागरिकता लिने अधिकांश भारतीय मूलका महिला छन् । अर्यालका अनुसार चालु आर्थिक वर्षको २०७५÷०७६ को साउन महिनामा मात्र वंशजको आधारमा ४ सय ९, वैवाहिक अंगीकृत ४१ जना र नागरिकता प्रतिलिपी लिनेको संख्या १ सय २२ रहेको अर्यालले जनाएका छन् ।

चन्द्रौटाबाट द्रूत राहदानी सेवा
चन्द्रौटा (कपिलवस्तु), १५ भदौ– कपिलवस्तुको विजयनगर गाउँपालिका ४ का दिपक मल्ल स्थानीय स्तरमै सजिलै राहदानीको सिफारिस पाएपछि निकै खुशी छन् । राहदानीको सिफारिसकै लागि मात्र तौलिहवा धाउनुपर्ने बाध्यता हटेपछि उनी खुशी भएका हुन् । इलाका प्रशासन कार्यालय चन्द्रौटाले पहिलो पटक विहीबारबाट द्रुत राहदानी सिफारिसको कार्य शुभारम्भ गरेपछि सिफारिस लिने मल्ल पहिलो व्यक्ति हुन् । अब राहदानीको सिफारिसकै लागि मात्र तौलिहवा धाउनु नपर्ने भएको छ ।
इलाका प्रशासन कार्यालय प्रमुख नरबहादुर खड्काले मल्लको राहदानीको सिफारिस गरी हस्तान्तरण गरे । जिल्ला सदरमुकाम तौलिहवामा मात्र राहदानीको काम हुने हँुदा जिल्लाका पश्चिमी क्षेत्रका नागरिकले सास्ती बेहोर्नु परेको थियो । स्थानीयको समस्यालाई मध्यनजर गर्दै राहदानीको सिफारिस चन्द्रौटाबाट वितरण कार्य सुरु गरिएको प्रमुख खड्काले बताए । काठमाडौं गएर राहदानी बनाउनेले अब सिफारिसकै लागि तौलिहवा धाउनु पर्दैन – खड्काले भने ।