खोज

बहुपक्षीय प्राविधिक तथा आर्थिक सहयोगका लागि बंगालको खाडीको प्रयास बिमस्टेकको चौथो शिखर सम्मेलन आजदेखि सुरु हुँदैछ ।
सम्मेलनमा सहभागी हुनका लागि तीन सदस्य राष्ट्रका सरकार तथा राष्ट्र प्रमुख नेपाल आइसकेका छन् । म्यानमारका राष्ट्रपनि विन मिन्ट मगंलबार नेपाल आइपुगेका हुन भने, भुटानका अन्तरिम मन्त्रिपरिषद अध्यक्ष ल्योन्पो छिरिङ वाङचुक र श्रीलंका राष्ट्रपति मैत्रीपाल सिरिसेना बुधबार नेपाल आईपुगेका छन् । भारत, बंगलादेश र थाइल्यान्डका राष्ट्र प्रमुख भने आज मात्रै नेपाल आइपुग्ने कार्यक्रम रहेको परराष्ट्रमन्त्रालयका सचिव शंकरदास वैरागीले जानकारी दिए । भारतीय प्रधानमन्त्री नरेन्द्र मोदी आज बिहान साढे आठ बजे काठमाडौं आइपुग्ने कार्यक्रम छ । यस्तै, बंगलादेशका प्रधानमन्त्री शेख हसिना वाजेद सवा नौ बजे र थाइल्यान्डका प्रधानमन्त्री प्रयुत चान ओचा सवा १० बजे काठमाडौं आइपुग्ने कार्यक्रम रहेको परराष्ट्रमन्त्रालयले जनाएको छ ।
म्यानमारका राष्ट्रपति विन मिन्त भने मंगलबार नै नेपाल आइपुगेका छन् । उनलाई उपप्रधानमन्त्री तथा रक्षामन्त्री ईश्वर पोखरेलले त्रिभुवन विमानस्थलमा स्वागत गरेका थिए । बिमस्टेकमा नेपालसहित म्यानमार, श्रीलंका, भुटान, भारत, बंगलादेश र थाइल्यान्ड गरी ७ सदस्य रहेका छन् ।
विद्युत लाइन प्रसारणको अन्तरदेशीय मार्गबारेको सहमति पत्र हस्ताक्षर हुने भएको छ । बुधबार भएको बिमस्टेकको मन्त्रीस्तरीय बैठकले सहमतिपत्र हस्ताक्षरका लागि सम्मेलनमा प्रस्तुत गर्ने निर्णय गरेको हो । बैठकमा सहभागी मन्त्रीहरूले ग्रीड इन्टरकनेक्सनसम्बन्धी सहमतिपत्रमा हस्ताक्षर गर्ने तयारी पूरा भएको परराष्ट्र मन्त्रालयका प्रवक्ता भरतराज पौडेलले जानकारी दिए ।
बिमिस्टेक शिखर सम्मेलनको पूर्वतयारी स्वरूप हिजो बसेको १९ औं सचिव स्तरीय बैठकले प्रसारण लाइन सम्बन्धी सहमतिपत्रलाई हस्ताक्षरका लागि सिफारिस गर्ने निर्णय गरेको थियो । बैठकमा परराष्ट्र मन्त्री प्रदीप ज्ञवालीले श्रीलंकाका विदेश राज्यमन्त्री बसन्ता सेना नायकेलाई मन्त्रीस्तरीय बैठकको अध्यक्षता हस्तान्तरण गरेका छन भने बिमिस्टेकको पाँचौ शिखर सम्मेलन श्रीलंकामा हुनेछ ।