खोज

लुम्बिनी साँस्कृतिक नगरपालिका स्थित लुम्बिनी प्राथमिक उपचार स्वास्थ्यकेन्द्रमा स्वास्थ्यकर्मीहरू द्वारा रगत परिक्षणमा आर्थिक अनियमितता गरेको आरोप छ । केन्द्र ब्यवस्थापन समिती तथा सरोकारवाला निकायको फितलो अनुगमनका कारण स्वास्थ्यकर्मीहरूको मिलोमतोमा रगत परिक्षण शुल्क वापत दुई देखि चारसय रूपैयाँसम्म लिएपनि रसीद दिने गरेका छैनन् ।
आफूले रगत जाँच गराए वापत चार रूपैयाँ शुल्क तिरेपछि रसीद नपाएको लुम्बिनी साँस्कृतिक नगरपालिका वडा नं. ४ बस्ने सेवाग्रही साबिदा खातुनले जानकारी गराइन । त्यस्तै आफूले पनि रगत जाँच गराउँदा दुईसय रूपैयाँ शुल्क तिरेपछि रसीद नपाई रित्तै घर फर्किन थालेकी केवटलिया निवासी अर्को सेवाग्रही प्रियागुप्ताको गुनासो छ ।
बिना रसीद कर्मचारीहरूले रगत परिक्षणका लागि आउने सेवाग्राहीहरूसँग अबैध रकम असूली गरिरहेको स्वास्थ्य केन्द्रका एक अहेव सरहका स्वास्थ्यकर्मीले नाम नखुलाउने शर्तमा जानकारी गराए । अहेव रमेश यादवले तीन डाक्टरको उपस्थितीका बावजूद पनि ओपीडीकक्षमा गैह्रकानूनी ढंगबाट बसेर धमाधम बिना रसीद सेवाग्राहीहरूसँग शुल्क लिने गरेको स्वास्थ्यकेन्द्र स्रोतको भनाई छ ।
यद्यपि अहेव यादव सँग जिज्ञासा राख्दा उनले नगदी रसीद सकिए पछि रजिष्टरमा नाम र ठेगाना उल्लेख गरिएको दाबी गरेका छन् । सो सम्बन्धमा केन्द्र ब्यवस्थापन समिती अध्यक्ष अक्ररामुद्दीन नाउ मुसलमान तथा लुम्बिनी साँस्कृतिक नगरपालिका स्वास्थ्य बिभाग संयोजक बुद्धनाथ बरईले सो घटनाबारे छानबिन पश्चात दोषी माथि आवश्यक कारबाही प्रक्रिया अघि बढाउने आश्वासन दिएका छन ।