खोज

चन्द्रौटा, १० असोज ।
सरकारले स्वास्थ्य क्षेत्रमा विभिन्न प्रदेशमा सरुवा रोग अस्पताल निर्माण गर्ने योजना अघि सारेको छ । कोभिड महामारीपछि स्वास्थ्य संरचनालाई मजबुत बनाउने उद्देश्यले संघीय सरकारले प्रत्येक प्रदेशमा सरुवा रोग अस्पताल स्थापना गर्ने नीति अवलम्बन गरेको छ । सोही अनुसार कपिलवस्तुको शिवराज नगरपालिकाको चन्द्रौटास्थित लुम्बिनी प्रदेशस्तरीय ५० शैयाको निर्माणाधीन सरुवा रोग अस्पतालको निर्माण कार्यले तीव्र गति लिएको छ । प्रदेशकै गौरवको योजना स्थानीयस्तरमा सरुवा रोग अस्पताल निर्माणको कार्यले तीव्रता पाएपछि हर्षित भएको स्थानीय सुरेश थारुले बताए ।

जग्गा प्राप्ति र वातावरणीय मूल्याङ्कन (आईईई) जस्ता कानुनी प्रक्रियामा भएको ढिलाइका कारण निर्माणको काम सुस्त भएपनि हाल निर्माण तीव्र गतिमा बढेको छ । निर्माण कम्पनीका इन्जिनियर निशान्त मण्डलले निर्माणाधीन अस्पतालको काम अहिले २० प्रतिशत सकिएको भएको बताए । उनका अनुसार अबको दुई वर्षभित्र सम्पूर्ण काम सम्पन्न हुनेछ । करिब २० करोड रूपैयाँको लागतमा निर्माण भइरहेको यो अस्पतालको काम सुरु हुन १३ महिना ढिलाइ भएको थियो ।

ठेक्का लागेको करिब १३ महिनापछि अस्पताल भवनको निर्माण कार्य सुरु भए पनि यति बेला निर्माण कम्पनीले अस्पतालको संरचनाहरू तीब्ररूपमा सञ्चालनमा छ । यस्तै लुम्बिनी प्रदेशका सांसद अर्जुन कुमार केसीले लुम्बिनी प्रदेशस्तरीय सरुवा रोग अस्पताल यस क्षेत्रको चिरप्रतिक्षित स्वास्थ्य संस्था भएको उल्लेख गरेका छन् । चन्द्रौटामा निर्माण भइरहेको ५० शैय्याको यस अस्पतालले आगामी दिनमा नागरिकलाई गुणस्तरीय स्वास्थ्य सेवाको प्रत्याभूति दिने उनले बताए ।

संघीय सरकारले कोभिड महामारीपछि सबै प्रदेशमा अत्याधुनिक सरुवा रोग अस्पताल निर्माण गर्ने नीति अनुरूप यो अस्पतालको निर्माण भइरहेको सांसद केसीले जनाए । करिब ६० हजार स्क्वायर फुट सेवा क्षेत्रमा फैलिएको यो अस्पतालको निर्माणमा प्रारम्भिक ढिलाइ भए पनि अहिले निर्माण कार्य तीव्र गतिमा अघि बढेको छ । “जग्गा प्राप्तिमा ढिलाइ र वातावरणीय प्रभाव मूल्याङ्कन (आईईई) जस्ता प्रक्रिया पूरा गर्न समय लागेको हो ।” सांसद केसीले भने: उनले अबको दुई वर्षमा अस्पताल सञ्चालनमा आउने र यसले क्षेत्रीय नागरिकलाई गुणस्तरीय स्वास्थ्य सेवा उपलब्ध गराउने बताए ।

केसीका अनुसार अस्पताल सञ्चालनमा आएसँगै दक्ष जनशक्ति प्राप्त हुनेछ । यस क्षेत्रका नागरिकलाई बुटवल, भैरहवा वा भारतसम्म पुग्नुपर्ने बाध्यता अन्त्य हुनेछ । २० करोड ९६ लाख ३ हजार ३ सय २६ रूपैयाँको अस्पताल निर्माणको लागत छ । सरकारले सरुवा रोग अस्पतालको लागि ९ बिगहा जग्गा प्रदान गरेको छ । स्काई सगुन जेभी बुटवलले अस्पताल निर्माणको ठेक्का पाएको छ ।