खोज

गुल्मी, ०७ मंसिर ।
जिल्ला प्रशाशन कार्यालय गुल्मीमा गत तीन महिनादेखि बढेको सेवाग्राहीहरूको चाप अझै घटेको छैन । गत असोज महिनादेखि दैनिक रूपमा प्रकाशन कार्यालयमा नागरिकता, राहदानी, राष्ट्रिय परिचयपत्र लगायतका कामका लागि आउने सेवाग्राहीको संख्यामा बृद्धि हुँदै गएको छ ।

दैनिक रूपमा दिनहुँ कार्यालय समय भन्दा तीन घण्टा अघिदेखि प्रशासन कार्यालयमा सेवाग्राहीहरूको लामो लाईन लागेको हुन्छ । चाडवाड सकिएपछि पनि कार्यालयमा आउने सेवाग्राहीहरू भने दिनहुँ उत्तिकै देखिन्छन । जिल्ला प्रशासन कार्यालयमा यसरी सेवाग्राहीहरूको चाप बढेपछि सेवादिने सेवा प्रदायक कार्यालयलाई पनि सेवाग्राहीहरूको चापलाई व्यवस्थापन गर्न धौधौ पर्ने गरेको छ । कार्यालयमा सेवाग्राहीहरूको बाक्लो उपस्थिति भएपछि कार्यालयले बेलुकासम्म बसेर सेवा प्रवाह गर्दै आएको सहायक प्रमुख जिल्ला अधिकारी हरि प्रसाद गैरेले जानकारी दिएका छन ।

कार्यालयमा यसरी सेवाग्राहीहरूको चाँपबढेपछि प्रशासन कार्यालयले टोकन प्रणाली मार्फत रादानीका लागि कतिपय दिनमा पछिल्लो दिनको टोकन समेत अघिल्लो दिनमा बितरण गर्दै आईरहेको छ । गाउँगाउँवाट एकै पटक ठूलो संख्यामा सेवा लिन आउन थालेपछि कार्यालयमा नागरिकता बनाउनका लागि कतिपय अबस्थामा दुइ दिनसम्म पालो पर्खनु पर्ने बाध्यता छ ।
कार्यालयमा धेरै चाँप हुनेहुँदा टाढाटाढाबाट आउने सेवाग्राहीहरू अघिल्लो दिन सदरमुकाम आएर बास बस्ने र बिहानै कार्यालयमा पुगेर लाईनमा बस्ने गर्दछन् । सेवाग्राहीहरूको लाईनमा कहिलेकाही कार्यालयको गेट बाहिरसम्म पुग्ने गर्दछ । सेवा ग्राहीहरूको बाक्लो उपस्थिति हुने जिल्ला प्रशासन कार्यालय गुल्मीमा आजभोली सयौं मानिसहरू नागरिकता, राहदानी र अन्य सिफारिसकालागि विहानैदेखि दिनहुँ लाईनमा देखिन्छन् । कार्यालय समय शुरु हुनु अगाडि लाईनमा बसेर पालो पर्खने र चाँडै काम सकाएर घर फर्कने आशमा नागरिकताको सिफारिस र राहदानीको टोकन बोकेर घण्टौसम्म आफ्नो पालो पर्खिरहेका हुन्छन् ।

यस अघि दैनिक सरदर ४० देखि ६० वटासम्म नागरिकता वितरण र राहदानीको फाराम भर्ने जिल्ला प्रशासन कार्यालयमा अहिले नागरिकता बनाउने, राहदानीको फाराम भर्ने र अन्य कामका लागि आउनेहरूको संख्या दैनिक चारसय भन्दा बढी हुने गर्दछ । त्यसका अतिरिक्त राष्ट्यि परिचपत्रमा पनि उत्तिकै चाँप हुनेगर्दछ ।

कार्यालयमा सेवाग्राहीको अत्यधिक चाँप हुने भएका कारण दुइ जना प्रशासकीय अधिकृतको दरबन्दी कायम गरिएको छ । दुइ जना प्रशासकीयको दरबन्दी रहेको प्रशासन कार्यालयमा गत चार महिनादेखि एक जना मात्र प्रशासकीय अधिकृतले मात्र काम गर्दै आएका छन । कार्यालयमा नागरिकताको प्रतिलिपि लिने र अभिलेख प्रमाणित गर्न आउने मानिसहरूको संख्या पनि यो पटक विगतमा भन्दा अत्यधिक मात्रमा बढेको प्रशासकीय अधिकृत तारानाथ फुल्देलले बताए । जिल्लामा इलाका प्रशासन कार्यालय नहुँदा एकै ठाउँबाट सेवा प्रबाह गर्नुपर्ने भएको कारण सेवाग्राहीको चाँप बढ्दै गएको नागरिक समाजका संयोजक पदम प्रसाद पाण्डेले बताए ।