खोज

आफन्तले दुई महिना अघि नेपाल आउदाँ तौलिहवा बजारमा चोरी भएको मोटर साईकल फेला पर्ला भनेर भारतको उत्तर प्रदेशको सिद्धार्थनगर जिल्लाको बढनी थानामा कार्यरत भान्से प्रहरी शिव कुमार प्रजापतिले कल्पना समेत गरेका थिएनन । तर कपिलवस्तु प्रहरीले बरामद भएका चोरीका मोटरसाईकलको ईन्जिन र चेचिस नम्बर भारतिय प्रहरीलाई उपलब्ध गराएको थियो । प्रहरीले बरामद गरेको युपी ५५ पि ५२१२ नम्बरको स्पलेष्डर मोटरसाईकलको बिवरण पाए सगै प्रजापतिले आफनो मोटर साईकल कपिलवस्तु प्रहरीले बरामद गरेको जानकारी पाए । आफनो मोटरसाईकल फिर्ता पाउन मोटरसाईकलका आवश्यक काजगात बोकेर प्रजापति जिल्ला प्रहरी कपिलवस्तु आए । प्रहरीले सम्पुर्ण कागजात र मोटरसाईकलको ईन्जिन र चेचिस नम्बर मिलाउदाँ सबै बिवरण मेल खायो । यस पछि कपिलवस्तुका प्रहरी उपरिक्षक मनोज कुमार यादवले प्रजापतिलाई उनको मोटरसाईकलको चाबी हस्तान्तरण गरे । मोटरसाईकल फिर्ता पाएका भारतिय प्रहरीमा कार्यरत प्रजापतिले नेपालको कपिलवस्तु प्रहरीलाई धन्यबाद दिए । “दुई महिना अघि चोरी भएको मोटरसाईकल भेटिएला भनेर आशा मारेको थिए । तर मेरो मोटरसाईकल बरामद गरि हस्तान्तरण गरेकोमा नेपालको कपिलवस्तु प्रहरीलाई धन्यबाद दिन चाहन्छु । ” उनले भने ।
कपिलवस्तु प्रहरीले पछिल्लो एक महिनाको अबधीमा चोरीका १८ वटा सवारी साधन बरामद गरेको छ । बरामद भएकामा १६ थान मोटरसाईल र २ थान स्कुटी रहेका छन । प्रहरीले बिषेश सुचनाका आधारमा मोटरसाईल चोरीमा संलग्न गिरोहका ६ व्यक्तिलाई नियन्त्रणमा लिए सगै चोरीका उक्त परिमाणको मोटरसाईकल बरामद भएको हो । बरामद अधिकांस मोटरसाईकलमा नक्कली नम्बर प्लेट र भारतिय नम्बर प्लेट राखेको भेटिएको छ । प्रहरीले मोटरसाईकल चोरी गर्ने गिरोहका ६ व्यक्तिलाई चोरी मुद्दा चलाई आवश्यक अनुसन्धान अगाडी बढाएको प्रहरी नायब उपरिक्षक रवि रावलले बताए । उनले नम्बर नखुलेका र नम्बर फेरिएका नेपाली प्लेटका मोटरसाईकलको ईन्जिन र चेचिस नम्बर क्षेत्रिय ट्राफिक प्रहरी कार्यालय बुटवललाई उपलब्ध गराई सम्बन्धित सवारी धनी पत्ता लगाउने कार्य अघि बढाईएको रावलले बताए । त्यसै गरि भारतिय प्लेटका बरामद मोटरसाईकलको ईन्जिन र चेचिस नम्बर भारतिय प्रहरीलाई उपलब्ध गराई सम्बन्धित सवारी धनिलाई आवश्यक कागजात सहित सम्पर्क गर्न जानकारी गराईएको उनले स्पष्ट पारे । पछिल्लो समय आफुहरुले मोटरसाईकल चोरी गर्ने गिरोहलाई नियन्त्रणमा लिई २ थान स्कुटी र १६ थान मोटरसाईकल बरामद गर्न सफल भएको कपिलवस्तुका प्रहरी उपरिक्षक मनोज कुमार यादवले जानकारी दिए । उनले नागरिकले अपराधका घटनाको सुचना प्रहरीलाई दिने कार्यले यस्ता अपराधलाई निरुत्साहित पार्ने प्रष्ट पारे । “प्रहरीलाई नागरिकले समयमै सुचना दिए यस्ता अपराधलाई निरुत्साहित गर्न सकिन्छ भन्ने बिषयमा हामी ढुक्क छौ । ” उपरिक्षक यादवले भने ।